Hatutan.com, (03 Jullu 2023), Díli—Autoridade Protesaun Sivíl (APC-Sigla Português), liuhosi Gabinete Relasaun Esterna, fó-sai dadus hahú kedan iha fulan-Janeiru to’o mai Juñu tinan ne’e, rejista uma 1.199 mak hetan estragus, no sidadaun na’in 20 mak lakon vida (mate) tanba dezastre naturál ne’ebé mosu iha territóriu nasionál.

Diretór Relasaun Externa no Komunikasaun APC, Anacleto Caetano relata dadus Dezastre Naturais liu hosi konferénsia imprénsa iha kna’ar fatin Caicoli, Segunda (06/02/2023).

Diretór Gabinete Relasaun Esterna APC, Anacleto Caetano informa, dezastre naturál sira ne’e mai ho tipu oioin mak hanesan, anin-boot, inundasaun ka bee-sa’e, inséndiu ka ahi-han uma, nomós erozaun ka rai-monu ka rai-halai.

Lee Mós: Dezastre Naturál Hamate Ema Na’in-Tolu no Estraga Uma 26

Hosi totál uma 1.199 ne’ebé hetan estragus, Autoridade Protesaun Sivíl halo ona re-verifikasaun no konsidera katak iha uma 789 mak merese atu hetan apoiu rekuperasaun hosi governu, tanba sira-ninia kondisaun uma etragus totálmente no la salva buat ida.

“Deskrisaun hosi 789 ne’e, aat totál iha 264, aat natoon iha 159, aat kaman 366. Ida-ne’e konsidera ona sira atu iha direitu bá hetan apoiu rekuperasaun hodi harii fali sira-nia uma. Hosi Janeiru mai to’o Juñu 2023 ema mate hamutuk na’in 20,” Anacleto Caetano informa bá jornalista sira liuhosi konferénsia imprénsa iha kna’ar fatin APC, Caicoli, Segunda (03/07/2023).

Autoridade protesaun sívil, liuhosi gabinete atu fó hanoin nafatin, alerta bá ema hotu-hotu, atu kuidadu aan, sasán liu-liu bá sira ne’ebé mak hela iha área foho-lolon, maske la akontese udan, mosu ona anin-boot oitoan, tanba ne’e, husu atu kuidadu.

Haree hosi gráfiku akontesimentu ne’e, ahi-han uma mak barak liu. Signifika, ema ladun tau importánsia bá iha kestaun ne’e hanesan bainhira tein iha dapur ka bele mós da’et fali bá ahi-han uma, ka instalasaun fiu eletrisidade hirak ne’ebé mak iha uma, tenke tau ona importánsia no haree atu bele kuida, bele evita sasán sira.

Jornalista: Rogério Pereira Cárceres