Hatutan.com, (06 Outubru 2022), Díli- Prezidente Asosiasaun TANE Konsumidór António Ramos “Naikoli” da Silva hateten, prioridade TANE konsumidór nian mak nafatin halo sosializasaun bá direitu konsumidór nian hodi garante konsumidór sira fó informasaun kona-bá prinsipiu direitu konsumidór nian atu devér atividade ekonómiku bele la’o di’ak no fó benefísiu bá hotu-hotu.

Lee Mós : TANE Ajuda Konsumidór Sira Bele Asesu Cabaz Ai-han Barratu Liu

Prezidente Asosiasaun TANE Konsumidór, António Ramos da Silva. Foto/Elio dos Santos da Costa

Prezidente Asosiasaun TANE Konsumidór António Ramos “Naikoli” da Silva bá jornalista sira hafoin hasoru-malu ho Prezidente Repúblika, José Ramos-Horta iha Palásiu Prezidensiál, Kinta (06/10/2022) hateten, Asosiasaun Tane Konsumidór halo audiénsia ho Xefe Estadu, atu relata kona-bá servisu defeza konsumidór nian, liu-liu Tane nia relatóriu tinan 2021-2022.

Relatóriu ne’ebé durante ne’e TANE servisu hamutuk ho Uniaun Europeia aprova mak aprezenta bá Xefe Estadu, tanba Xefe Estadu nu’udar  Prezidente Onoráriu bá Tane konsumidór nian.

Atividade TANE Konsumidór durante tinan-rua ne’e iha períodu pandémia global Covid-19, maibé TANE Konsumidór nia ezisténsia ne’e fó nafatin garante asesu bá informasaun bá konsumidór sira no fó advokasia bá konsumidór, atende konsumidór sira-nia problema sira.

Nia afirma, Prezidente Repúblika nu’udar Xefe Estadu garante bá funsionamentu Estadu nian no implementasaun lei númeru 8/2016, 8 Jullu,  kona-bá protesaun konsumidór sira nian, tanba iha lei defeza konsumidór nia mós hakerek kona-bá devér jerál eEtadu nian.

TANE Konsumidór mós hato’o ba Xefe Estadu saida mak TANE Konsumidór halo liu husi relatóriu no mós saida mak TANE Konsumidór servisu ho Governu, liu-liu proteje bá konsumidór sira kona-bá lei sira ne’ebé falta, tan ne’e mak TANE aprezenta ona bá Governu liuhosi Prezidénsia Konsellu Ministru kona-bá lei sira ne’ebé presiza regulariza proteje bá konsumidór sira-nian no mós devér Estadu nian apoiu bá iha organizasaun defeza konsumidór sira nian.

“Iha ita-nia lei konsumidór ninia prinsípiu ne’e ida proteje konsumidór, seluk protreze interese ekonómiku estadu nian,” António “Naikoli” hateten.

Iha fulan-Maiu liubá mós TANE Konsumidór aprezenta ona relatóriu ida bá Governu, no mós aprezenta kona-bá diploma lejizlativa sira atu proteze bá konsumidór sira.

Ba tinan 2023 TANE Konsumidór sei kontinua asaun sosializasaun direitu konsumidór nian, formasaun bá konsumidór sira, formasaun tama iha eskola sira no mós reprezentasaun konsumidór nian reprezenta iha instituisaun Estadu nian.

Prezidente Repúblika José Ramos-Horta agradese bá servisu ne’ebé TANE Konsumidór halo fó benefísiu bá konsumidór sira.

Lee Mós : TANE Sai Ona Membru ba Consumers Internacional

Jornalista: Vito Salvadór