Hatutan.com, (23 Setembru 2022), Díli—TANE kontinua ajuda konsumidór sira atu hetan Cabaz ai-han ho folin kiik liu iha merkadu.

Iha fulan Agostu, halo tiha vizita ba loja 21 iha Díli, ekipa hosi TANE hetan cabaz barratu liu ho folin  $56,20 no karun liu ho folin $72,35.

Lee Mós:TANE Konsumidór Preokupa ho Folin Convustível iha Merkadu “Karun”

Tendénsia jerál hosi aumentu folin ne’e, hanesan nafatin ho fulan Abríl liu bá, ne’ebé maka cabaz sira varia entre $47,06 ho $66,60 ka ninia variasaun ne’e 29%.

Iha momentu atuál ne’ebé maka konsumidór Timor oan sira atravessa difikuldade bo’ot, tanba taxa dezempregu ass no afeta tebes família barak ninia rendimentu, TANE hakarak apoiu sidadaun sira hodi halo jestaun di’ak liu, tanba halo tuir informasaun kona-bá cabaz barratu liu, bele poupa to’o $16,15.

TANE hili produtu sira ne’ebé maka konsumidór sira buka barak liu, aumenta tán na’an fahi (porco) iha peskiza ida agora ne’e, verifika katak folin kiik liu ba produtu ida-ida, la haree ba marka ka orijin, iha loja 21 maka espalla iha postu administrativu tolu hosi Munisípiu Díli.

“Hosi peskiza ne’e konklui katak supermerkadu barratu liu maka Grasa Shop, iha Comoro, postu Administrativu D. Aleixo, Munisípiu Díli, ho valór totál $56,20. Ba fali folin aas liu maka iha Family First, postu Administrativu Dom Aleixo, Munisípiu Díli, ho valór totál $72,35,” Hatutan.com sita komunikadu.

Diferensa entre folin hosi supermerkadu ka loja ho cabaz karun no cabaz barratu, konsumidór sira bele poupa to’o $16,15.

Variasaun ba folin as tebes hosi loja sira, destaka produtu tolu maka valór karun liu dala rua to’o  tolu.

• Maçã kg ida ho folin $1,00 iha Searra Pantai Kelapa, no iha Meimart Comoro $4,50;
• Porco kg ida ne’ebé maka folin $2,60 iha Leader mart Kuluhun, no Meimart Audian no iha Meimart Fatuhada $10,75;
• Tomate kg ida  folin  $1,00 iha  Dilimart Bidau Akadiruhun, iha Phoenix 368 Akait no iha Centro Fresco Bidau $3,50.

Jornalista: Elio dos Santos da Costa