Hatutan.com, (27 Juñu 2022), Díli-Komisaun Anti-Korrupsaun (CAC, sigla portugés), Sesta (24/06/2022) submete ona relatóriu finál kazu projetu instalasaun Set-top Box (STB)/dexodificador Rádiu Televizaun Timor Leste, Empreza Públiku (RTTL,E.P) bá Ministériu Públiku (MP).

Lee Mós : CAC Identifika Arguidu Na’in-haat Bá Projetu Instalasaun Set-top Box RTTL,E.P

Diretór Jerál Investigasaun CAC, José Verdial. Foto/Hatutan.com

Konteúdu husi relatóriu ne’e, CAC konsege identifika arguidu sira inklui prejuízu indireta no direta bá Estadu ho valor  liu $60,000.00.

“Investigasaun halo hotu ona, tanba ne’e ami haruka ona relatóriu finál bá MP iha Sesta (4/06/2022),  ho konteúdu husi relatóriu ne’e, tanba kazu ne’e sei iha prosesu investigasaun maske haruka ona bá MP maibé sei kabe bá prosesu investigasaun. CAC konsege identifika arguidu no total prejuízu hamutuk $60,000.00, maibé seidauk kobre aldeia tomak tanba hakarak identifika loloos prejuízu tenke tuir benefisiáriu idak-idak hodi hatene instalasaun halo dunik ka lae, tanba ne’e iha ami nia relatóriu sita mós prazu ne’ebé MP fó katak prejuízu ne’ebé CAC identifika maka ne’e, maibé prejuízu bele aumenta se-kuandu identifikasaun bá to’o benefisiáriu idak-idak tanba kustu ba instalasaun mós iha,” Diretór Jerál Investigasaun CAC, José Verdial informa bá Hatutan.com iha ninia knar fatin, Farol-Díli, Segunda (27/06/2022).

Bainhira relatóriu ne’e  iha ona MP nia-liman, MP  iha kompeténsia hodi prodús akuzasaun no  bainhira relatóriu ne’ebé CAC aprezenta sufisiente ona, maibé karik presiza kompleta maka CAC prontu atu kontinua halibur dokumentu seluk.

Lee Mós : MAPKOMS La Fó Komentáriu Kona-bá Kazu Projetu Instalasaun Set-top Box RTTL,E.P

Iha kazu ne’e, bazeia bá rezultadu provas dokumental no sasin hamutuk na’in-17, CAC konsege identifika arguidu na’in-haat (4) ne’ebé involve iha krime abuzu bá podér, partisipasaun ekonomia iha negósiu, konflitu  interese no burla agravada relasiona ho projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu husi Melánia da Silva Fernandes Capela nu’udár Sekretaria iha Gabinete Prezidente FFTL.

Lee Mós : MAPKOMS Halo Keixa “Denúncia caluniosa” Hasoru Xefe Redasaun Hatutan.com

Jornalista : Carmelita Isaac