Hatutan.com, (03 Maiu 2022), Díli- Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, lakohi fó komentáriu kona-bá  kazu projetu instalasaun Set-top Box/ dexodifikador Rádiu Televizaun Timor Leste, Empreza Públiku (RTTL,E.P).

Lee Mós : Projetu Instalasaun Set-top Box RTTL,E.P, CAC Bolu Ona Sasin Na’in-Ualu

Ministru MAPKOMS, Francisco Martins da Costa Pereira Jerónimo (klaran) partisipa iha komemorasaun loron mundiál liberdade imprensa ne’ebé organiza husi CI iha Salaun Delta Nova, Díli, 03 Maiu 2022. Foto/Hatutan.com

Komisaun Anti-Korrupsaun (CAC, sigla portugés), oras ne’e, halo hela verifikasaun bá objetu krime iha terrenu hodi rona mós sasin sira nu’udár benefisiáriu bá iha projetu instalasaun Set-top Box RTTL,E.P ne’ebé nia valor projetu $900,000.00.

Relasiona ho prosesu investigasaun no verifikasaun bá objetu krime iha terrenu husi CAC ne’ebé oras ne’e iha faze final, Hatutan.com tenta halo konfirmasaun ho Ministru MAPKOMS, Francisco Martins da Costa Pereira Jerónimo, Tersa (03/05/2022), iha Delta Nova, Díli, maibé Ministru  la iha komentáriu relasiona ho prosesu investigasaun husi CAC bá iha kazu  projetu instalasaun Set-top Box RTTL,E.P

“Ha’u la iha komentáriu  ka no Comment,” Ministru Francisco Martins da Costa Pereira Jerónimo, lia tun hodi responde jornalista Hatutan.com hafoin partisipa iha serimónia komemorasaun loron mundiál liberdade imprensa, 03 fulan-Maiu 2022 ne’ebé organiza husi Conselho de Imprensa de Timor Leste.

Lee Mós : Kazu Projetu Instalasaun Set-top Box, Prezidente RTTL,E.P Presta Deklarasaun iha CAC

Hafoin CAC rona depoimentu husi sasin prinsipál hamutuk 12, iha faze inkéritu no investigasaun bá kazu projetu instalasaun Set-top Box RTTL, E.P, CAC submete tán pedidu bá Ministériu Públiku (MP) nu’udár na’in bá asaun penal atu fo tan tempu loron 70 bá CAC hodi finaliza prosesu investigasaun bá kazu projetu instalasaun Set-top Box RTTL,E.P.

Oras ne’e, CAC sei iha faze verifikasaun bá objetu krime iha terrenu no rona mós sasin sira ne’ebé sei mai husi benefisiáriu bá projetu instalasaun Set-top Box RTTL,E.P ho montante orsamentu $900,000.00.

Ministru MAPKOMS, Francisco Martins da Costa Pereira Jerónimo. Foto/Hatutan.com

Daudaun ne’e CAC koordena ona ho Prokuradór titulár hodi konklui no rona tan benefisiáriu na’in hira, tanba presiza rona de’it na’in-rua ka na’in-tolu nune’e labele han tempu.

Tuir delegasaun kompeténsia ne’ebé Ministériu Públiku (MP) fó bá CAC ho tempu loron 45 ne’ebé sei termina iha Segunda (25/04/2022), maibé husi parte CAC hatama ona pedidu bá MP hodi husu prolongasaun tempu hodi fó tan loron-70 bá CAC atu finaliza ninia investigasaun. 

Lee Mós : Projetu Instalasaun Set-top Box RTTL,E.P Iha Ona Faze Verifikasaun Objetu Krime

Ministériu Públiku delega kompeténsia bá CAC hodi hahú arrola sasin sira atu bá presta deklarasaun iha CAC, kona-bá indísiu krime ne’ebé iha relasaun ho projetu  instalasaun Set-top Box RTTL,E.P.

Hanesan informa ona katak projetu instalasaun Set-top Box RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu husi Melánia da Silva Fernandes Capela nu’udár Sekretaria iha Gabinete Prezidente FFTL.

Lee Mós : Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Vito Salvador