Hatutan.com, (14 Dezembru 2021), Díli-Komandu Polísia Nasional Timor-Leste (PNTL), liuhosi Servisu Investigasaun Kriminál Nasional (SIKN) arkiva ona kazu insidente iha resintu Federasaun Futeból Timor Leste (FFTL)  tanba  vítima hakarak dada-fila nia kazu hodi rezolve tuir dalan família.

Notísia iha Relasaun: Insidente iha Resintu FFTL, Francisco Jerónimo Sei Hato’o Keixa ba Tribunál

Dokumentu arkiva kazu hosi PNTL-SIKN. Foto/Repro

Portavós Komandu PNTL, Superintendente Xefe Polísia, Arnaldo de Araújo, konfirma katak akontesimentu ema deskoñesidu ne’ebé ba harahun vidru karreta funsionária ida nian iha resintu FFTL ne’e, parte vítima ho suspeitu rezolve ona tuir dalan família.

“Hakarak informa, katak akontesimentu ne’ebé akontese iha resintu FFTL nian iha  loron  07 fulan-Novembru 2021, suspeitu deskoñesidu baku rahun karreta funsionária FFTL nian ida ne’ebé para iha resintu FFTL no  depois parte rua ne’e halo tiha ona mediasaun, nune’e vítima rasik dada fila-fali kazu ne’e no kazu ne’e sira taka,” Superintendente Xefe Polísia, Arnaldo de Araújo, informa ba jornalista sira liuhosi konferénsia iha Kuartél Jerál PNTL, Caicoli, Díli, Tersa (14/12/2021).

Notísia iha Relasaun: Oan-Feto Hosi Prezidente FFTL Konsidera Notísia Hatutan Inventa no HOAX

Nia afirma tan, tanba kazu ne’e remata ona, PNTL sei la ko’alia tan ida ne’e. Kazu ne’e arkiva, tanba parte vítima rasik dada fila-fali nia deklarasaun ne’ebé nia halo iha PNTL-SIKN.

“Ida ne’e fila-fali ba iha vítima, sé hakarak dada, entaun prosesu ne’e sira taka. Vítima mak sofre ba konsekuénsia ida0ne’e, mais nia mak hakarak taka. Ohin hosi investigadór kriminál SIKN fó mai, dehan katak kazu ne’e taka. Sira konkorda malu, katak dada fila-fali,” Arnaldo de Araújo afirma tan. 

Notísia iha Relasaun: Exco Suspende Indeterminadu Xefe Gabinete Prezidente FFTL

Jornalista: Rogério Cárceres