Hatutan.com, (18 Novembru 2021), Díli-Reuniaun Komité Ezekutivu (Exco) Federasaun Futeból Timor Leste (FFTL), Tersa (16/11/2021), deside suspende ho tempu indeterminadu ba Xefe Gabinete Prezidente FFTL nian.

Notísia iha Relasaun: Reuniaun Exco Oras Haat Liu, La Diskute Insidente iha Resintu FFTL

Sekretáriu Jerál FFTL, Nelio Isaac Sarmento. Foto/Espesiál

Sekretáriu Jerál FFTL, Nelio Isaac Sarmento, konfirma  ba Hatutan.com via telefone, Kinta (18/11/2021), katak reuniaun Exco iha Tersa  liubá deside fó sansaun administrativa ba Xefe Gabinete ho inisiál MF  tanba pratika aktu dezobediénsia ba ierarkia no mensajen ho konteúdu lia-fuan insulta hasoru Sekretáriu Jerál FFTL nian.   

“Desizaun sira (Exco-red) foti tiha ona, tanba dezobediénsia ba ierarkia no desizaun ne’e tama iha vigora iha Segunda ( 22/11/2021),” Nelio Isaac Sarmento hateten hodi kofnirma tan katak desizaun  Exco  ne’e hasai karta suspensaun indeterminadu  no entrega tiha ba MF no nia tempu  válidu  komesa iha segunda semana oin.

Nelio Isaac Sarmento hateten mós katak desizaun ne’e bainhira la hetan satisfasaun husi parte relevante (MF-red), maka bele halo rekursu tuir estatutu FFTL nian ba Komisaun Étika no Disiplinár  FFTL nian.  

“Problema ne’e administrativu interna iha organizasaun nian. Organizasaun iha ninia komisaun étika no dixiplina.  Ba funsionáriu sira, klube sira, ka ba ema sira ne’ebé mak halo prátika desportu futeból sente la kontente ho desizaun ruma bele hatama rekursu ba Komisaun Étika no Disiplinár hodi halo investigasaun,” Nelio Isaac esplika.

Nelio Isaac Sarmento mós konfirma katak desizaun Exco FFTL nian ba Xefe Gabinete Prezidente FFTL nian ne’e laiha relasaun ho kazu insidente iha resintu FFTL nian iha loron 07 fulan-Novembru 2021, ne’ebé rezulta karreta Nisan kór metan ho númeru matrikula A.22-765 hetan estragus.

Informasaun ne’ebé Hatutan.com halibur husi fontes oioin iha FFTL no baze ba dokumentu komunikasaun WhatsApp iha grupu FFTL nian ne’ebé agora la ativa (dezativa) ona, katak iha fulan hirak liubá akontese dezentendimentu ida iha Edifísiu FFTL laran relasiona ho video balun ne’ebé viral iha Facebook iha relasaun ho MF ne’e.

Husi video ne’ebé viral tempu ne’ebá,  MF deskonfia katak Sekretáriu Jerál FFTL, Nelio Isaac Sarmento, maka espalla iha media sosiál no to’o deskonfia katak Nelio Isaac maka fahe tutan ba jornalista sira hodi publika ho intensaun atu hamonu MF nia dignidade.

Ho nune’e, MF halo insultu ida no hakilar Sekretáriu Jerál  to’o ameasa lori naran Prezidente FFTL, Francisco Jerónimo  nian.

La to’o iha ne’e, MF mós lansa insultu liuhosi WhatsApp hodi hasai lia-fuan balun la merese ba superior sira tuir moral no étika.

Hatutan.com tenta ona konfirma situasaun ne’e ho MF liuhosi telefónika no WhatsApp (7422****), maibé to’o notísia ne’e publika seidauk hetan resposta.

Jornalista : Rogério Cárceres