Hatutan.com, (14 Novembru 2024), Díli—Prezidente Repúblika (PR), José Ramos-Horta inaugura Eskola Ensinu Báziku Fillial (EBF) Kamlai,  Postu Administrativu Maubessi, Munisipiu Ainaro, kinta (14/11/2024).

Prezidente Repúblika (PR), José Ramos-Horta inaugura Eskola Ensinu Báziku Fillial (EBF) Kamlai, Postu Administrativu Maubessi, Munisipiu Ainaro, kinta (14/11/2024). Foto Media PR.

Komunikadu ne’ebé Hatutan.com asesu hateten, edifísiu eskola ne’e hetan tulun hosi doadór sira mai hosi Austrália ho Kristy Sword Gusmão liu hosi Fundasaun Alola,  serbisu hamutuk ho ekipa Spend it Well ne’ebé ho voluntariamente halo kriasaun fundus hodi apoia infraestrutura bá eskola foun ne’e.

Lee Mós: Estudante EBF Binibu Pune Lori Bee-Moos Hosi Uma Bá Eskola

“Ita Agradese bá doadór sira hosi Austrália. Agradese mós bá mana Cristy Gusmão, nia mak hari’i Alola Fundation, servisu di’ak no servisu maka’as iha Dili, bolu feto sira ne’ebé vitima violénsia doméstika la’ós de’it fó fatin de’it bá sira, maibé fó mós protesaun  ba sira, halo tranning bá sira, fa’an sasan, halo sasan ho kualidade, sai ONG ida ne’ebé forte ho reál, jestaun ne’ebé di’ak. Kristy Sword Gusmão mak hateten bá ha’u kona-bá eskola ida-ne’e. Ha’u agradese Spend it Well tanba sira halo eskola barak ona iha Timor-Leste,” Prezidente Repúblika José Ramos-Horta hateten iha komunikadu.

Voluntáriu sira hosi Spend it Well balun halo eskola, balun halo klínika, balun ajuda hanesan rotáriu sira ajuda buat seluk, balun fó bolsa estudu, purtantu sosiedade Austrálina, ema individuál mós ajuda maka’as.

Xefe Estadu Agradese mós ba Governu Austrália ne’ebé tinan barak ona ajuda Timor-Leste, nia parte kontente tebes no sempre disponivel wainhira konvida nia mai, tanba Edukasaun importante duni ba oan sira nia futuru.

Total Fundus hosi ekipa Spend it well ne’ebé apoia konstrusaun eskola ne’e  ho montante $70,000,00 liu.

Eskola Ensinu Báziku Fillial (EBF) Kamlai ne’e hari’i tanba kuantidade númeru estudante barak loos bele reforsa mós dezenvolvimentu iha eskola Ensino Básico Central sígla (EBC) Maubessi Villa.

Totál estudante iha eskola fillial Kamlai 136 pessoas, Estudante Mane hamutuk 78 no estudante feto hamutuk 58 ne’ebé fahe ba klasse 1º ano, 2ºano no 3º ano.

Fasilidade iha Eskola ne’e menus kadeira ho meja, daudaun ne’e Ministériu Edukasaun halo ona akizasaun ba materiál sira iha armajen, semana tuir mai sei kompleta kadeira ho meja foun, inklui livru ne’ebé agora daudauk iha dalan 70 mill livru ba estudante sira.

Ministériu Edukasaun prosede tiha ona ninia prosesu aprovizionamentu, nune’e iha tempu badak sei kompleta no sei to’o iha Timor hodi apoiu mos ba eskola públika no eskola privadu sira iha territóriu nasionál tomak.

Jornalista: Vito Salvadór