Hatutan.com, (06 Novembru 2024), Oé-Cusse– Estudante hamutuk 196 iha Eskola Báziku Filiál Binibu Pune, iha Aldeia Pune, Suku Usi-tasae, Postu Administrativu Oe-silo, Rejiaun Administrativu Espesiál Oé-Cusse Ambeno (RAEOA), tinan barak, enfrenta  problema bee-moos, nune’e obriga estudante sira tenke lori bee-moos hosi uma atu atende nesesidade durante tempu aprendizajen.

Lee Mós: ESG Puin Beno Laiha Edifísiu bá Profesór sira

Estudante sira lori fila jerigen bá uma hafoin sira kontribui lori bee-moos husi uma bá eskola. Foto/Lazaro Pereira Quefi

“Ami nia defikuldade boot liu mak bee la iha. Agora dadaun estudante sira asesu ba merenda eskolár mós problema boot tanba kozineiru sira atu te’in uza bee saida, ami nia bee kleur ona la iha ami nia tanki no haris fatin iha so bee mak la iha, ne’e mak ami husu ba nai-ulun sira no governu atu bele tau-matan ba nia eskola ne’e liuliu bee-moos,” Koordenadór EBF Binibu Pune, Jose Quelo hateten ba Hatutan.com iha EBF Binibu Pune, foin lalais ne’e.

Ba merenda ninian kozinaria sira mak lori bee-moos hosi uma mai mak tein ba estudante sira, no eskola mós hameno ba estudante sira atu sira idak-idak  lori bee-moos ka bee-hemu hosi uma no lori mós bee tau iha balde ka jerigen  hodi fase sira-nia liman no karik uza ba saneamentu nian.

Kada loron obrigatoriamente estudante ida tenke lori bee-moos hodi hemu liliu iha loron sabadu ema ida tenke lori bee-moos litru lima (5) hodi ense atu prepara ba fase-liman molok atu han no uza mós ba buat seluk

Jose Quelo husu ba governu atu bele rezolve lalais bee-moos tanba estudante barak sempre ba eskola tama tarde ho razaun lori bee entaun defikulta tebes ba sira nia movimentu no balu monu tutuir dalan tanba tutur ho bee-moos iha ulun.

Estudante iha Eskola Bazika Filial Binibu Pune hamutuk na’in -196 no professor na’in-neen (6).

Jornalista Estajiáriu: Lazaro Pereira Quefi