Hatutan.com (05 Setembru 2024), Díli- Prezidente Repúblika (PR), José Ramos-Horta ho Xefe Governu Kay Rala Xanana Gusmão la kontente ho asaun brutalizmu husi Guarda Munisípiu Díli hamutuk ho Sekretáriu Estadu Toponímia no Organizasaun Urbana (SEATOU), Germano Santa Brites ne’ebé harahun no estraga vendedór ambulante sira-nia sasán no modo ne’ebé fa’an iha estrada ibun.

Lee Mós: PLP Lamenta Atuasaun SEATOU, CNRT Husu Lori Bá Tribunál

PR Ramos-Horta ho PM Xanana konversa iha Palásiu Prezidensiál, Kinta (05/09/2024). Foto/Elio dos Santos da Costa

Prezidente Repúblika José Ramos-Horta ba jornalista sira iha Palásiu Prezidensiál, Kinta (05/09/2024) hateten, iha enkontru semanál ho Primeiru-Ministru ne’e, sira na’i- rua ko’alia de’it preparativus sira hodi hein vizita Papa Francisco nian, ko’alia kona-ba papél governu nian, jestaun no desizaun sira.

Nia subliña iha sorumutuk ne’e foti mós kestaun balun ne’ebé sai preokupasaun públiku nian mak problema ne’ebé Guarda Munisípiu Díli hamutuk ho SEATOU baku negosiante nia sasán iha merkadu Kampu Baru, ne’e hatudu video ba Primeiru Ministru.

“PM Xanana la haree video ne’ebé viral loos iha Facebook kona-bá atuasaun SEATOU nian ne’e no nia husu ba ha’u ne’e akontese bainhira, akontese horibainrua, nusa la ko’alia de’it loloos ho ema muda atu kansela lai durante no oferese kompensasaun. Maun Xanana sókadu loos nia la haree, tanba nia nunka haree média sosiál buat sira ne’e, entaun ha’u hatudu video ne’e ba nia, haree buat sira nune’e, nia la kontente,” José Ramos-Horta hateten.

Xefe estadu mós husu favór atu  Xanana husu deskulpa ba ema sira ne’e no oferese kompensasaun ba sira ne’e.

Xanana konkorda, no Prezidénsia Repúblika, nia desizaun mak ne’e se governu la halo buat ruma entremu husu deskulpa kompensasaun, Prezidénsia Repúblika ho nia osan rasik prontu atu kompensasaun ba ema sira ne’e sasán ne’ebé sira lakon.

“Klaru ema hotu-hotu tenke kolabora, kontribui atu buat hotu-hotu la’o ho di’ak, hanesan loron 30 Agostu buat hotu-hotu iha Timor Leste la’o di’ak loos, laiha insidente oan ida, purtantu, povu, juventude kolabora lalika ba sobu ema nia sasán, baku tan buat sira ne’e,” Horta afirma.

SEATOU nia asaun atu hamoos Sidade Labele Harahun Vendedór sira-Nia Sasan

Primeiru-Ministru, Kay Rala Xanana Gusmão hateten SEATOU nia servisu atu garante sidade mós no Organiza didi’ak komunidade sira.

“Imi haree to’ok Díli agora moos, organizadu, imi hakarak ita la’o hamutuk hotu sa’e bus ida ita haree Díli, tanba SEATOU sobu arbiru Dili agora fo’er liu loos ka la’e. Sei haree, nia aprezenta tiha ona ha’u sei haree, ha’u labele aseita mak baku, mas ita ko’alia bá malu buat sira ne’e hotu, mas karik mak tanba ida ne’e mak ha’u proibe Dili agora moos liu,” Primeiru-Ministru Kay Rala Xanana Gusmão tenik.

Nia subliña ho SEATOU nia servisu mak Díli agora organizadu no moos, maibé kona-ba asaun brutalizmu ne’ebé iha xefe governu mós la aseita no husu atu SEATOU ho Guarda Munisípiu Dili labele baku sasán sira vendedór nian, ne’e labele tenke bolu atensaun no ko’alia, esklarese, konvense ida ne’e mak komportamentu loloos.

Jornalista: Vito Salvadór