Justisa & Krime

Kazu Osan Millaun $3, Tribunál Hapara Levantamentu no Transferénsia Osan husi Kompañia Six One Community Asia Unipessoal Lda iha Banku Mandiri

Published

2 years ago

29/07/2024

Hatutan.com, (29 Jullu 2024), Díli- Tribunál Judisial Primeiru Instánsia Dili (TJPID) liuhosi Juiz turnu Afonso Carmona, hasai ona despaixu hodi halo suspensaun ka hapara atividade levantamentu (foti) no transferésia osan hosi Kompañia Six One Community Asia Unipessoal Lda nia númeru konta bankária iha Banku Mandiri iha Díli.

Lee Mós: PCIC Detein Sidadaun Nigeria Na’in-rua ho Objetu Krime Osan Millaun $3

TJPID hala’o primeiru interogatóriu judisial bá Arguidu sira ne’ebé deskonfia envolve iha rede hack Kompañia ENLGG Singapura PT.LTD nia e-mail hodi foti ka ‘na’ok’ osan millaun $3 hosi totál osan millaun $42. Foto/Tome da Silva

Defensór Públiku Estáquio Guterres informa katak, desizaun bá suspensaun ida ne’e tanba Ministériu Públiku (MP) mak hato’o rekerementu bá Tribunál atu kansela urjentemente Kompañia SMILTA GMBH Unipessoal Lda nia dokumentu konta bankária, hodi evita ema seluk foti ka transfere fali tán osan hirak ne’ebé sei iha konta laran.

“Ministériu Públiku rekere bá iha Tribunál, husu bá iha Tribunál, urjentemente Tribunál hatuun despaixu atu halo kanselamentu bá konta bankária ne’ebé maka en-nome arguidu sira nian, no osan ne’ebé maka agora dadauk deskonfia tama iha konta bankária. Kansela ne’e para atu labele lai halo transferénsia movimentu osan ne’e labele sai fali ka atu bele transfere fali bá ema seluk. Signifika katak, osan ne’e iha nafatin konta bankária ne’ebé mak antes ne’e iha tiha ona,” Defensór Estáquio Guterres hatete bá Jornalista sira iha Tribunál Díli, Segunda (29/07/2024).

Primeiru Interrogatóriu Judisial

Iha Sábadu (27/07/2024), tuku 14:00 lorokraik, Tribunál Judisial Primeiru Instánsia Dili (TJPID), hala’o primeiru interogatóriu judisial bá Arguidu na’in-lima, kompostu hosi Nigerianu na’in-rua ho ho inisial VD, no USN, ho Timoroan na’in-tolu ho insiial FJFSdS, AJSF no DTSF ne’ebé, deskonfia envolve iha rede hack Kompañia ENLGG Singapura PT.LTD nia e-mail, hodi foti ka ‘na’ok’ osan millaun $3 hosi totál osan millaun $42.

Iha audiénsia, primeiru interogatóriu ne’e, Ministériu Públiku (MP) ne’ebé reprezenta hosi Prokuradór João Marques, Pedro Baptista no Domingos Gouveia Barreto, promove arguidu sira ho krime tolu mak hanesan, Brankeamentu Kapitál (Aritgu 13), Burka Informátika (Artigu 268), no Asosiasaun Kriminoza (Artigu 188 iha Lei Kógidu Penál Timor-Leste nian).

Audiénsia primeiru interogatóriu judisial ne’e hala’o durante loron rua, Sábadu to’o Domingu, tanba Juiz rona deklarasaun ida-ida hosi arguidu sira, no difísil liu mak Nigerianu na’in-rua tanba presiza halo tradusaun hosi lingua Inglés bá Tétum no Tétum bá Inglés.

Nune’e desizaun bá kazu ne’e, Tribunál sei hasai nia desizaun ikus bá arguidu sira liu-liu rona medida koasaun saida mak atu atribui bá arguidu sira hodi resposbiliza sira nian aktu kriminál.

Audiénsia primeiru interrogatóriu judisial ne’e prezide hosi Juiz Turnu Afonso Carmona, Ministériu Públiku (MP) reprezenta Prokuradór João Marques, Pedro Baptista no Domingos Gouveia Barreto. Arguidu sira hetan asisténsia legál hosi Advogadu Privádu Octávio Cardoso, Marino da Cruz, Rui Mendonça, inklui Defensór Públiku Estáquio Guterres no Laura.

Reprezentante Kompañia ENLGG Singapura PT.LTD ne’ebé mak manda osan bá kompañia SIX ONE Community Asia PT.LTD, reprezenta hosi Advogadu Privádu Bedigno Guterres.

Tuir kronolójia, Kompañia ENLGG Singapura PT.LTD manda osan ho valór Millaun $42 bá iha Kompañia SIX ONE Community Asia PT.LTD nia konta bankária. Maibé, osan hirak ne’e tama fali iha Kompañia SIX ONE Community Asia Unipessoal Lda nia konta bankária, ne’ebé na’in mak arguidu Timoroan na’in-tolu.

Osan hirak ne’e tama fali bá konta bankária seluk, tanba hetan hack hosi Nigerianu na’in-rua iha 22 Jullu 2024, foin lalais, iha ne’ebé arguidu sira bá dada osan fíziku ho montante Millaun $3, iha Banku Mandiri iha Dili, Timor-Leste.

Polisia Internasional bá organizasaun Kriminal nian (INTERPOL-sigla Inglés) Singapura alerta mai Policia Ciêntífica e de Investigação Criminal (PCIC) atu bele buka tuir. Tanba ne’e, iha 24 Jullu 2024, PCIC iha kooperasaun ho Servisu Nasionál bá Intelijénsia (SNI), Servisu Informasaun Militár, no Servisu informasaun PCIC nian rasik, buka tuir kedas Suspeitu sira.

To’o iha tuku 15:00, lorokraik, autoridade seguransa sira konsege halo detensaun ka kapturasaun bá Nigerianu na’in-rua iha área Hudi-laran, no Timoroan na’in-tolu, inisial FJFSdS kaer iha Burger King, Colmera, kaer AJFS iha duni Banku Mandiri, no DTSF kaer iha área Fomentu.

Hafoin kapturasaun, forsa konjunta transporta kedas suspeitu sira bá iha PCIC, no Investigadór sira halo prosesu identifikasaun, hodi detein iha Sela PCIC nian durante oras 72, no evidénsia krime sira aprezenta bá Ministeriu Públiku ne’ebé mak nu’udár na’in bá asaun penal.

“Agora rasik sei rona nafatin arguidu sira, arguidu nain-rua, hela arguidu ida mak seidauk rona,” dehan Defensór Estáquio Guterres.

Totál osan ne’ebé PCIC rekolla iha primeiru apreensaun ho Arguidu na’in-lima ne’e iha Millaun $2,242, no iha segundu kapturasaun, rekolla tán Rihun $150.

Lee Mós: PCIC Asegura Tan Objetu Krime Osan Rihun $150

Jornalista: Rogério Pereira Cárceres

Up Next

DE iha Ajénsia Estadu Ida Komete Asédiu Seksuál, Hahú Husi Hasé Bonita Loos, Telefone Husu Hasoru iha Otél To’o Konvida Viajen bá Bali

Don't Miss

PCIC Asegura Tan Objetu Krime Osan Rihun $150

Click to comment

Justisa & Krime

Komisaun A Husu CAC Servisu ho Instituisaun Intelijénsia Sira iha Luta Kontra Korrupsaun

Published

5 days ago

20/10/2026

hatutan

Jornalista: Felix Fernandes

(more…)

Justisa & Krime

20 Outubru-ne’e, Tribunál Díli realiza julgamentu ba argiudu sira iha kazu Set-Top Box RTTL, E.P

Published

1 week ago

15/10/2026

hatutan

Hatutan.com, (15 Outubru 2026), Díli— Tribunál Judisiál Primeira Instánsia Díli (TJPID) ajenda ona audénsia julgamentu ba arguidu na’in-rua ne’ebé komete kazu projetu instalasaun Set-Top Box (STB) Rádiu Televizaun Timor-Leste, Empreza Públika (RTTL,E.P).

(more…)

Justisa & Krime

Tauk Povu Lakon Konfiansa Ba Tribunál, Komisaun La Públika Valór Ezame Kandidatu Juízes

Published

1 week ago

15/10/2026

hatutan

Hatutan.com (15 Outubro 2026), Díli – Membru Komisaun Rekrutamentu Juiz ba Tribunál Supremu Justisa (TSJ), Carmelita Caetano Moniz hatete, Kandidatu ne’ebé hetan valór ne’ebé to’o ba kritériu aprova sei hetan estatutu aptu, enkuantu sira ne’ebé la atinji valór ne’ebé determina sei konsidera la aptu, kandidatu sira ne’ebé la aptu iha direitu atu hato’o reklamasaun, no juri sei analiza reklamasaun hirak-ne’e antes foti desizaun.

Tuir Carmelita, servisu juis nian iha responsabilidade bo’ot iha sosiedade, tanba desizaun judisiál sira afeta diretamente direitu no moris sidadaun sira. Tanba ne’e, nia konsidera katak avaliasaun ba juis tenke hala’o ho kuidadu no tuir kritériu ne’ebé klaru.

“Valór ita labele tau, tanba sé juíz ida hetan valór ida ki’ik tebes, konfiansa povu nian ba tribunál oinsá? impaktu sosiál makas tanba ho ida ne’e mak juíz sira nia servisu la hanesan ita bai-bain. Juíz nia servisu ne’e servisu ida ne’ebé ita dehan depois de Maromak, segundu maromak iha mundu mak juíz sira ona, ema hotu-hotu tenki kumpri, sira haruka ba prizaun tenki ba, entaun ita tenki rezerva tebes sasan sira ne’e,” Dehan Membru Komisaun Rekrutamentu Juiz ba Tribunál Supremu Justisa (TSJ), Komisária Carmelita Caetano Moniz, iha Palásiu Governu, Kinta 15/10/2026.

Nia mós rejeita kona-ba diskriminasaun iha prosesu avaliasaun, nia afirma katak membru juri na’in tolu no sekretáriu ida mai husi Portugal, no sira la koñese kandidatu sira ne’ebé partisipa iha prosesu rekrutamentu.

“Primeiru la iha diskriminasaun ba valór tanba juri na’in 3 ho sira nia sekretáriu ida mai hotu husi ne’eba (Portugal) sira nein koñese kandidatu ida, ne’ebé ita atu ko’alia deskriminasaun husi ida ne’ebé? Afasta sira ne’e tanba valór la to’o, tuir regulamentu avaliasaun ne’ebé mak komisaun aprova katak ezame eskrita ne’e sira ne’ebé iha valór masimu di’ak liu ne’e mak 20,” Nia informa

Avaliasaun ba ezame eskrita hala’o tuir regulamentu ne’ebé komisaun aprova ona. Tuir nia, kandidatu ne’ebé hetan valór máximu 20 mak konsidera aptu ka pasa, enkuantu kandidatu ne’ebé hetan valór menus husi 10 la pasa.

Nia mós kompara sistema ne’e ho avaliasaun karreira iha instituisaun judisiál no Ministériu Públiku, ne’ebé uza kategoria kualifikadu no la kualifikadu. Nia konsidera katak publikasaun valór individual ba juis bele iha impaktu ba konfiansa públiku ba tribunál.

Vaga ne’ebé disponivel limitadu kompara ho númeru kandidatu sira, kandidatu na’in 32 kompete ba vaga ne’en (6) iha Tribunál Supremu Justisa, enkuantu kandidatu na’in 24 seluk kompete ba vaga sia iha Tribunál Rekursu.

Nia aumenta, kandidatu sira ne’ebé la hetan vaga iha faze ida bele hein oportunidade seluk atu partisipa iha prosesu seleksaun ba Tribunál Rekursu ka Tribunál Supremu Justisa, tuir vaga no kondisaun ne’ebé disponivel.

“Kandidatu sira ne’ebé la pasa iha prosesu seleksaun ba tribunál superior sira sei kontinua hala’o sira-nia funsaun nu’udar juis iha primeira instánsia, no bele partisipa fali iha konkorsu tuir regra no oportunidade ne’ebé disponivel,” Nia salienta.

Iha parte seluk, komisáriu José Pedro Camões, esplika, avaliasaun ba kandidatu sira hala’o tuir kritériu ne’ebé komisaun determina ona, ho rezultadu aptu no la aptu. Kandidatu sira ne’ebé la konkorda ho rezultadu avaliasaun bele uza sira-nia direitu atu hato’o reklamasaun.

“Ezame ne’e iha maneira rua atu fó valór tau aptu no la aptu, ida valór sufisiente ba leten mak aptu no ida númeru eskala ki’ik ne’e mak la aptu ne’ebé la’os buat foun ida, labele deskonfia, bai-bain dehan valór iha 6 ba leten ne’e valór ida di’ak, karik valór 5 mai kraik ne’e valór ida ladun di’ak, ne’ebé maneira atu avalia ne’e mak ida ne’e, se la aptu, sira bele uza sira nia direitu atu halo reklamasaun, depois juri sira sei hare’e sira nia reklamasaun ne’e atu fó fali desizaun seluk,” Esplika Membru Komisaun Rekrutamentu Juiz ba Tribunál Supremu Justisa (TSJ), José Pedro Camões.

Desizaun kona-ba prosesu avaliasaun no rekrutamentu juis nian tama iha kompeténsia Konsellu Superior Majistratura Judisiál, tuir lei no regulamentu ne’ebé vigora.

Jornalista: Maria Angelita Sandi Belo