Hatutan.com, (09 Jullu 2024), Díli—Governu Repúblika Demokrátika Timor-Leste (RDTL) ho Repúblika Angola asina akordu kooperasaun vístu livre bá titulares passaporte diplomátika no passaporte servisu nian entre país rua.

Ministru Negósius Estranjeirus no Kooperasaun (MNEK), Timor-Leste, Bendito dos Santos Freitas ho nia omólogu Ministru Relasaun Exteriór Repúblika Angola, Téte António asina akordu kooperasaun vístu livre bá titulares passaporte diplomátika no passaporte servisu nian entre país rua, iha Palásiu Prezidensiál Luanda, Segunda (08/07/2024). Foto: MNEK.

Akordu ne’e asinadu hosi Ministru Negósius Estranjeirus no Kooperasaun (MNEK), Timor-Leste, Bendito dos Santos Freitas ho nia omólogu Ministru Relasaun Exteriór Repúblika Angola, Téte António.

Lee Mós: PR Ramos-Horta Halo Vizita Ofisiál bá Mozambique ho Angola

Akordu Vistu Livre ne’e, governante na’in-rua asina iha ámbitu enkontru Estadu  entre Prezidente Repúblika, José Ramos-Horta ho nia omólogu Prezidente Angola, João Lourenço, iha Palásiu Prezidensiál Luanda.

Akordu izensaun vistu bá titulares passaporte diplomátiku no passaporte servisu ne’e importante tebes, tanba bele fasilita di’ak liután movimentasaun entre ofisais diplomatas Timor-Leste ho Angola nian, hodi bele hametin liután kooperasaun bilateral iha futuru.

Ministru Negósius Estranjeirus nasaun rua ne’e asina mós memorandu entendimentu hodi estabelese kooperasaun iha área konsulta polítika diplomátika no mós akordu kooperasaun entre Akademia Diplomátika “Venâncio de Moura” Ministériu Relasaun Exterior Angola ho Sentru Estudu Diplomátiku MNEK Timor-Leste.

Prezidente Repúblika Angola, João Lourenço hateten, maski Angola seidauk harii embaixada iha Dili, maibé, delegasaun nasaun rua nian hala’o hela servisu no faktu hatudu, Timor-Leste ho Angola konsege asina instrumentu kooperasaun importante tolu ne’e, liu husi vizita estadu Prezidente Ramos-Horta nian iha Angola.

“Ami nia delegasaun konserteza funsiona no ida-ne’e prova hosi faktu katak ami foin asina pesoalmente instrumentu kooperasaun balun entre ami nia nasaun. Poténsia bá kooperasaun entre ita na’in-rua laiha limite, ita tenke hatene iha ne’ebé mak poténsia eziste no haree diretamente. Ami nia misaun atu koopera iha domíniu sira seluk iha domíniu turizmu, domíniu komérsiu,” Hatutan.com sita deklarasaun Prezidente Angola, João Lourenço iha komunikadu, tersa (09/07/2024).

Prezidente Angola hatutan, Timor-Leste ho Angola iha relasaun ne’ebé di’ak tebes hanesan mós nasaun membru CPLP ne’ebé dura tinan barak ona, tanba ne’e, presiza dezenolve liután kooperasaun iha setór importante seluk tan hodi fó benefísiu ba povu no nasaun rua ne’e.

Nune’e mós Prezidente Repúblika, José Ramos-Horta hateten, asinatura ba akordu izensaun vistu ba titulares passaporte servisu no diplomátiku ne’e hanesan relasaun esessionál no ezemplár husi planu polítika diplomátika pesoál ho nasaun membru CPLP hotu liu-liu ho Repúblika Angola.

Ho akordu ba izensaun vistu ne’e, bainhira Timor-Leste adere ona ba ASEAN, Timor-Leste bele sai hanesan armajen ba resdistribuisaun protudu sira husi nasaun membru PALOP ho CPLP tama iha merkadu rejionál ASEAN.

“Ha’u fiar katak, ho ami nia adezaun ba ASEAN, hanesan ha’u nia konviksaun katak Timor-Leste bele sai hanesan armajen boot ba produtu sira hosi nasaun PALOP ka CPLP ba sira nia redistribuisaun iha área refere,” Ramos-Horta hateten.

Potensialidade koperasaun bilaterál Angola no Timor-Leste liu-liu iha dimensaun ekonómika PALOP, CPLP, Timor-Leste nu’udar membru ASEAN, halo parte iha merkadu rejionál ho konsumidór millaun 700 ho 4 triliaun PIB kombinadu husi nasaun sira ASEAN sira, tanba sei sai mós oportunidade boot ida ba CPLP ba implementasaun aktu kooperasaun balun ne’ebé estabelese ona.

Durante enkontru, Prezidente Repúblika, José Ramos-Horta extende konvite bá Xefe Estadu, João Lourenço, atu halo vizita bá Timor-Leste nu’udár aktu prinsípiu resiprosidade atu bele hametin liután amizade no kooperasaun entre nasaun rua.

Jornalista: Vito Salvadór