Hatutan.com, (08 Jullu 2024), Díli- Nasaun membru Komunidade País Língua Portugeza (CPLP-sigla portugés) apresia ho Timor-Leste nia partisipasaun ativu iha servisu organizasaun Sentur Análize Estratéjika (CAE).

Lee Mós: TL-Mozambique Asina MoU Tolu Inklui Esplorasaun Mina no Gás

MNEK Bendito dos Santos Freitas vizita bsede CAE/CPLP iha Maputo, Moçambique. Foto/Mídia MNEK

Deklarasaun ne’e Ministru Negósiu Estranjeiru no Kooperasaun (MNEK), Bendito dos Santos Freitas hato’o hafoin reprezenta Prezidente Repúblika, José Ramos-Horta, hala’o vizita ba iha sede CAE/CPLP, iha Maputo, Moçambique.

Komunikadu ba imprensa ne’ebé Hatutan.com asesu husi Gabinete Média MNEK, Segunda (08/07/2024), relata vizita MNEK Bendito dos Santos Freitas ne’e simu direta husi Diretór CAE/CPLP, Koronél Armindo Alcides Garcia Sá Miranda Nogueira ho estrutura.

Ministru Bendito dos Santos Freitas hateten, organizasaun CAE/CPLP harii iha tinan 1996 iha kontestu CPLP nian, ne’ebé objetivu atu halo análize no peskiza kona-ba asuntu defeza no seguransa inklui mós estabelese kooperasaun entre nasaun membru CPLP iha setór rua ne’e.

“Sentru ida-ne’ebé estabelesidu iha 1996 to’o agora ho ninia relevánsia makas teb-tebes bá dezenvolvimentu setór análize no peskiza kona-bá asuntu relativamente bá defeza, seguransa no ssuntu kooperasaun entre estadu membru sira CPLP nian. Husi aprezentasaun señór Koronél Armindo Miranda Sá, ita deskobre katak, importánsia teb-ebes, sira mós louva Timor-Leste nia partisipasaun iha organizasaun ida-ne’ebé importante tebes,” Bendito dos Santos Freitas  hateten.

Alende halo análize no peskiza, CAE/CPLP mós iha kalendarizasaun, estruturasaun operasionalizasaun di’ak atu bele fó hanoin no fó konseitu liu-liu kona-ba asuntu estratéjiku sira.

“Ho ida-ne’e mak ita Timor mós partisipa ativamente no ita mós iha kontribuisaun kuota kada tinan $6,000. Ha’u hanoin ita atu kumpre ida-ne’e, nu’udar membru sira seluk kumpre hotu,” tenik Bendito dos Santos Freitas.

Moçambique hanesan nasaun resipiente ne’ebé oferese fasilidade infraestrutura no lojístika no mós kuádru tékniku sira sira-ne’ebé mak operasionaliza atividade CAE/CPLP nian, enkuantu estadu membru sira seluk kontribui kuota $6,000 kada tinan.

Tuir Ministru Bendito Freitas katak, Ministru Defeza ho Komandu F-FDTL iha ona koñesimentu kle’an kona-bá kooperasaun CAE/CPLP nian, tanba ne’e, presiza servisu hamutuk hodi bele prepara aan di’ak liután bainhira Timor-Leste simu prezidénsia rotativa atu lidera organizasaun CAE/CPLP ne’e iha futuru.

Vizita Ministru Bendito dos Santos Freitas bá CAE/CPLP ne’e, akompaña husi Diretór-Jerál Bilateral ba Asuntu, Áfrika Europa, Amérika no Médiu Oriente, Francisco Dionísio Fernandes ‘Mau-kura’, Primeira Sekretáriu Embaixada Timor-Leste bá Moçambique, Lenilde Pereira no seluk tan.

Jornalista: Vito Salvadór