Hatutan.com, (29 Juñu 2024), Díli-Komandante Jerál Polísia Nasionál Timor-Leste (PNTL), Komisáriu jerál Henrique da Costa, durante loron 26 to’o 27 fulan-Juñu 2024, partisipa iha simeira ka sorumutuk entre Xefe Polísia Nasoins Unidas nian bá da-haat ka United Nation Chief of Police Summit 2024 (UNCOPS) iha Nova Iorke.

Lee Mós: TL-ONU Kontinua Diskute Programa Prioridade Sira Ne’ebé Reflete ho ODS

Komisáriu Jerál Polísia Henrique da Costa akompaña husi Embaixadór TL bá ONU, Dionisio Babo Soarea partisipa iha simeira Xefe Polísia Nasoins Unidas nian bá da-haat ka United Nation Chief of Police Summit 2024 (UNCOPS) iha Nova Iorke. Foto/Espesiál

Simeira internasional UNCOPS ne’e halibur ministru, xefe polísia no reprezentante seniór sira hosi organizasaun polísia rejionál no profisionál sira iha sede ONU nian, hodi envolve iha reforsu pás internasionál, seguransa no dezenvolvimentu bá ema hotu liuhosi kbi’it ida-ne’ebé unifika no kna’ar polísia nasionál no Nasoins Unidas nian.

Durante eventu internasional ne’e, Ministru, Xefe Polisia no reprezentante seniór sira hosi organizasaun polísia rejionál no profisionál sira hato’o sir ida-idak ninian intervensaun. Nune’e, hosi Polisia Nasional Timor-Leste nian, Komisáriu Henrique da Costa husu bá ONU atu envolve membru PNTL barak iha misaun internasionál kona-bá manutensaun pás nian.

“Durante intervensaun, ha’u  hato’o progresu no evolusaun PNTL nian to’o agora. PNTL husu atu envolve barak iha misaun internasionál no hetan oportunidade mós hanesan nasaun seluk. Ita Husu atu ekipa selesaun UN nian bele mai TL hodi halo selesaun bá ita-nia Polisia sira hodi partisipa barak iha misaun internasional sira liu-liu kona-bá manutensaun Pás nian,” Komisáriu jerál Henrique da Costa, informa bá Hatutan.com  liuhusi komunikasaun  WhatsApp, Sábadu (29/06/2024).

Haktuir bá Wikipedia ne’ebé Hatutan.com asesu iha sábadu ohin, fó sai katak, Sorumutuk Xefe Polisia Nasoins Unidas nian ba da-haat (UNCOPS 2024) ne’e, foka liu bá identifika aproximasaun no prátika sira mak hanesan tuir mai ne’e;

Primeiru, operasionaliza Divizaun Polísia Nasoins Unidas nian papél nu’udar fornesedór servisu iha sistema laran tomak no pontu fokál ba polísia Nasoins Unidas nian no asuntu ezekusaun lei sira seluk.

Segundu, reforsa esforsu sira ne’ebé la’o hela atu hasa’e dezempeñu Polisia Nasoins Unidas nian liuhusi reforsu kapasidade sira, inklui lansamentu Kompaktu Voluntariu kona-ba Advansa Paridade Jeneru iha Polisia Nasoins Unidas nian.

Terseiru, integra prioridade polísia Nasoins Unidas nian iha prosesu pás no seguransa internasionál sira, diskusaun no foru sira.

UNCOPS 2024 mós oferese oportunidade úniku ida bá polísia ezekutivu sira iha mundu no lideransa Nasoins Unidas nian atu envolve iha diskusaun kona-bá oinsá polísia Nasoins Unidas nian no polísia nasionál reforsa malu bainhira hasoru dezafiu seguransa globál sira ne’ebé mosu daudaun, inklui krize no insidente sira ne’ebé halo husi ema no naturál sira.

Lider polísia sira ne’e bá ho komprensaun boot liu tán kona-bá oinsá sira-nia ofisiál nasionál sira ne’ebé fila hosi servisu Nasoins Unidas nian hetan ona abilidade, koñesimentu no esperiénsia ne’ebé sira-nia ofisiál nasionál sira ne’ebé mai hosi servisu Nasoins Unidas nian fó benefísiu bá sira-nia servisu polísia no populasaun rasik.

Delegasaun hotu-hotu husu atu hatudu pedidu preliminár ruma bá reuniaun bilaterál ho ofisiál seniór Nasoins Unidas nian sira bá pontu kontaktu sira ne’ebé lista ona iha UNCOPS 2024 nia instrusaun atu tama.

Tenke halo arranju ba enkontru bilaterál entre delegasaun sira diretamente entre parte sira. Sala konferénsia sira-ne’e rezerva tiha ona durante 25 to’o 28 Juñu, ne’ebé bele asina liuhosi kontaktu pontu kontaktu sira ne’ebé hatudu iha instrusaun konjuntu.

Estadu-membru sira mós iha oportunidade atu hatudu sira-nia kompromisu atu hametin Polisia Nasoins Unidas nian liuhosi kompromisu konkretu atu fó apoiu.

Jornalista: Rogério Pereira Cárceres