Hatutan.com,( 07 Juñu 2024), Díli—Levantamentu bá foos folin iha merkadu sira iha territóriu nasionál ne’ebé halo husi Diresaun Nasionál Regulasaun Komersiu  no Protesaun Konsumidor  (DNRKPK), Ministériu Komérsiu no Indústria ( MCI, sigla portugés) hatudu katak foos folin iha merkadu nasionál to’o merkadu munisipál sira laiha problema.

Lee Mós: Xanana Rekoñese Difisil Kontrola Foos Folin iha Merkadu

Negosiante sira husi Munisípiu sosa foos iha distribuidór foos iha Díli. Foto/Elio dos Santos da Costa

Alvu levantamentu ne’ebé sai hanesan sample ba DNRKPK-MCI mak merkadu Baucau, Manatuto, Same no Ermera, hatudu foos folin iha munisípiu sira ne’e sa’e maioria $0.50 sentavu to’o $1.00 kada saku kilograma 20 no kilograma 25.

Foos iha merkadu munisípiu sira ne’e sosa husi distribuidór foos iha Díli ne’ebé fa’an ho presu $17.00 kada saka 20 kilograma lori bá munisípiu fa’an entre $17.50 sentavu to’o $18.00. nune’e mós foos ho marka folsom fa’an iha Díli $19.00 kada saku lori bá munisípiu fa’an ho folin $19,50 sentavu to’o $20.00 kada saku.

Levantamentu husi DNRKPK-MCI iha Postu Administrativu Atsabe, Munisípiu Ermera hatudu foos folin sa’e duni too $19.00 ho razaun tanba distánsia dook liu, no mós kondisaun estrada ne’ebé grave tebes hodi implika ba kondisaun karreta ne’ebé tula foos tanba ne’e komunidade sira fan presu aas.

Diretóra DNRKPK, Manuela Silva Tilman, Sesta (07/06/2024), haktuir bá Hatutan.com iha nia servisu fatin iha Díli, katak bazeia ekipa DNRKPK nia observassun, levantamentu  no monitorizasaun ba presu nesesidade báziku hanesan foos dadaun ne’e sei normal hela tanba laiha presu ida ne’ebe mak aas liu.

“Sira mai sosa foos iha Díli ho presu $17.50 sentavu entaun lori ba fa’an fali  aumenta deit sentavu $50 sentavu to’o $1.00 kada saka,”  Manuela Silva Tilman hateten

Daudaun ne’e empreza importador foos hanesan Perisos no Creative Furak mós direitamente lori foos ba faan iha kada munisípiu ho presu ne’ebe normal hanesan ho Díli.

Governu hahú Fa’an Foos ho Folin $12,50 Sentavu

Diretóra DNRKPK, Manuela Silva Tilman. Foto/Leopoldina de Carvalho

Governu liu husi Ministeriu Koordenador asuntu Ekonomiku (MKAE) liu husi Sentru Lojistika Nasionál  (CLN, sigla portugé) ho MCI kontinua halo intervensaun ba folin foos iha kada munisípiu.

“Ba maluk sira ne’ebé mak kbiit la to’o atu asesu ba foos ne’ebe mak folin $17.00 to’o $18,50 sentavu, daudaun ne’e Governu liu husi DNRKPK iha ona planu servisu hamutuk ho MKAE  haree ba foos baratu ne’ebe mak hahú ona lansamentu iha loron 5 fulan-Maiu iha Oé-Cusse no Atauro, no tuir mai sei ba iha Ermera hodi fa’an foos ho folin $12,50 sentavu kada saku,” Manuela Silva Tilman informa.

Nia esplika Distribuisaun foos ba faze ida ne’e diferente ho faze dahuluk ne’ebe Governu halo kontratu ho empreza importador sira tanba agora ne’e  funsionáriu sira husi p CLN tun direitamante ba halo distribuisaun iha suku no aldeia  ho foos kilograma 25 ho marka MAKE fa’an $12,50 sentavu.

Antes ne’e CLN ho DNRKPK distribui ona foos tonelada 50 ho kuantidade kilograma 25, fa’an  ho folin  $12,50 sentavu  iha merkadu Oé-cusse ho Atauro.

Jornalista: Leopoldina de Carvalho