Hatutan.com, (03 Maiu 2024), Díli–Provedoria  Direitus Umanus no Justisa (PDHJ) kondena aktu ‘brutalizmu’ husi pesoál membru Servisu Sekreta ne’ebé lori pistola tiru kanek joven ida no halo agresaun fíziku bá maluk defisiénsia iha área Salele, Postu Administrativu Tilomar, Munisípiu Covalima, Kuarta kalan (01/05/2024).

Lee Mós: Pesoál Servisu Sekreta Tiru Joven ida iha Salele no Seidauk Hatene Nia Motivu

Família sira evakua vitíma bá ospitál hodi hetan tratamentu intensivu. Foto/Espesiál

Provedór Direitu Umanus no Justisa (PDHJ), Virgílio da Silva Guterres, hateten  baibain uza violénsia liuliu tiru hanesan ne’e asaun ida ne’ebé mak tenke kondenadu. Tanba ne’e, PDHJ husu bá entidade relevante atu prosesa problema ne’e no lori ema ne’ebé mak involve iha tiru ne’e tenke responsabiliza bá nia aktu krime ne’e.

“Ita hotu-hotu kondena  no tenke kondena duni tanba kilat ne’ebé mak Polísia ka se de’it mak kaer ne’e la’ós atu tiru joven sira ka sidadaun sira, maibé kilat uza hodi defende interese povu ninian. Bainhira ita uza la ho responsabilidade, ida-ne’e asaun kondenadu,” Provedór Virgílio da Silva Guterres “Lamukan”, hateten bá Hatutan.com iha Díli, Sesta (03/05/2024).

Bá akontesimentu ida-ne’e parte PDHJ fó hatene ona ba provedoria diresaun delegasaun territoriál ne’ebé mak responsabiliza bá ida-ne’e atu haree no rekolla dadus detallu bá akontesimentu ne’e.

Virgílio da Silva Guterres hatutan, ba rekomendasaun sira ba polísia no militár iha durante ne’e iha formasaun lubuk ida ona ne’ebé mak PDHJ halo bá membru militár no mós polísia sira iha buat importante ida ne’ebé mak subliña no foka mak oinsá komunikasaun entre militár ho polísia mak importante no depois mós tenke respeita Kode profisionál ne’ebé mak iha seguransa ninian.

“Sirkunstánsia ka situasaun ida ne’ebé mak obriga ita ka fó nesesidade bá ita atu uza kilat ida ne’e mak padraun bá direitu umanu nian bá polísia no militár katak bainhira atu uza kilat ne’e tenke iha definisaun ne’ebé klaru,” antigu prezidente Conselho de Imprensa Timor-Leste ne’e hateten.

Jornalista Estajiáriu: Lazaro Pereira Quefi