Hatutan.com, (03 Abríl  2024), Díli— Governu liu hosi Ministériu Obras Públika (MOP) kria rejime espesiál hodi fó ajudikasaun direta bá kompañia 7 hodi halo rehabilitasaun bá estrada iha área urbana Díli.

Ministru Obras Públika, Samuel Marçal hateten, kriasaun rejime espesiál ne’e tanba rekezitu bá konkursu públiku lalais liu fulan 6, liga ho programa vizita Santo Padre Francisco nian, nune’e konsidera nu’udár ajenda urjente iha tinan 2024.

Lee Mós: Governu Aprova Projetu Dekretu-Lei Rejíme Espesiál Aprovizionamentu Vizita Papa Francisco

Tanba ne’e, nia dehan, Governu la konsege preve osan, nune’e tinan ida-ne’e Konsellu Ministru deside hasai rejime espesiál hodi halo ajudikasaun direta bá kompañia sira ne’ebé iha kapasidade hodi ezekuta obra sira ne’e.

“Kompañia hirak ne’ebé hala’o hela servisu rehabilitasaun bá estrada urbana iha Dili laran ne’e Governu fó ajudikasaun haree bá sira ne’ebé iha kapasidade finanseira no ekipamentus,” Samuel Marçal hateten hafoin reuniaun Konsellu Ministru, Kuarta (03/04/2024).

Ministru ne’e dehan, Governu labele fó bá kompañia ida ne’ebé atu halo rehabilitasaun ho alkatraun ne’e depois nia ba aluga fali, ida ne’e halo kustu ne’e aumenta.

“Tanba ne’e maka fó bá sira ne’ebé iha kapasidade hodi bele aselera lalais tanba ita hatene hela katak iha tempu badak bainhira vizita Santu Padre nian iha Timor,  ita tenki finaliza estrada urbana no protokolu sira,” nia hateten.

Membru Governu ne’e rekoñese katak, servisu hirak ne’e tarde oitoan tanba impaktu hosi klima hanesan udan boot no mós ho problema sosiál tanba komunidade barak seidauk bele koopera ho Governu, tanba ne’e prejudika prossesu negosiasaun.

Maski nune’e, Governu sei esforsu hodi bele apoia kompañia sira atu bele finaliza estrada hirak ne’e iha fulan Agostu ka Setembru nia laran tanba bainhira kompañia ne’e la hala’o nia servisu maka sei fó impaktu bá iha ezekusaun orsamentu, maibé kuandu sira halo lalais entaun ezekusaun mós sei la’o lalais.

Kompañia hirak ne’ebé halo projetu ne’e ho kapasidade finanseiru másimu liu maka millaun $2 to’o millaun $3 tanba projetu estrada ne’e ho kuantidade maka hosi kilometru 2 to’o 3.

Jornalista: Leopoldina de Carvalho