Hatutan.com, (20 Marsu 2024), Díli—Reitór Universidade Nasionál Timor Lorosa’e (UNTL), João Soares Martins husu IX Governu atu sériu dezenvolve sidade universitáriu ne’ebé antes ne’e deside hodi muda ona hosi munisípiu Aileu mai Hera.

Reitór Universidade Nasionál Timor Lorosa’e (UNTL), João Soares Martins. Foto dok João Martins.

Reitor UNTL ne’e dehan, kona-bá sidade universitáriu Aileu inisia hosi VIII Governu hodi halo ona lansamentu no halo ona kompensasaun inklui selu rai afetadu sira iha munisípiu Aileu maibé agora paradu hela tanba IX Governu la preve bá kontinuasaun iha Orsamentu Jerál Estadu (OJE) 2024 nian.

Lee Mós: Osan Laiha, Projetu Sidade Universitáriu Aileu “Paradu”

“IX Governu deside kansela sidade universitáriu Aileu, agora atu destina bá fali Hera. Tanba ne’e ami husu Governu no Parlamentu Nasionál atu bele tau kompromisu bo’ot nune’e bele dezenvolve sidade universitariu ne’ebé mak dedikadu ona iha Hera,” João Soares Martins hateten iha Parlamentu Nasionál, hafoin halo audiénsia ho Komisaun G, Kuarta (20/03/2024).

Tuir João Soares Martins  katak, iha Orsamentu Jerál Estadu tinan 2025 hosi UNTL sei propoin bá Governu atu bele hahú halo espansaun bá infraestrutura UNTL nian.

“Ami hahú ona fakuldade Agrikultura mak halo inaugurasaun iha fulan kotuk. Fakuldade ne’e sei funsiona iha tempu oin mai hamutuk ho fakuldade enjeñaria no sei aumenta bá fakuldade Medisina. Finalmente sei kobre bá fakuldade sanulu iha UNTL nia laran nune’e bá oin karik harii fakuldade 20 atu bele bá hotu Hera,” nia informa.

Iha fatin hanesan, Prezidente Komisaun G Parlamentu Nasionál ne’ebé trata asuntu Edukasaun Joventude Sidadania no Kultura, deputadu Armando dos Santos Lopez hateten, kona-bá sidade universitáriu iha munisípiu Aileu ne’ebé VIII Governu lansa, maibé Obra la kontinua, tanba ne’e desizaun agora daudaun hosi IX Governu nian katak, tenke fila hotu bá iha UNTL Hera.

“Tenke fila-hotu bá Hera hodi konsentra bá iha ne’ebá no rezidénsia estudante sira hosi munisípiu hotu-hotu sei konsentra mós iha Hera,” nia dehan.

Nia mós hato’o katak, UNTL mós preokupa tanba iha Orsamentu Jerál Estadu 2024 nian, IX Governu la preve hodi kontinua obra harii universitáriu Aileu ne’e.

Tanba ne’e, nia hatutan, iha OJE 2025 nian nia rekomenda bá sira katak, tenke mai hato’o preokupasaun sira ne’e iha uma-fukun ne’e atu deputadu sira tenta ho Ministériu Ensinu Superiór oinsa bele haree iha tinan 2025 hodi preve orsamentu ba ida-ne’e.

Jornalista Estajiária: Zita Menezes