Hatutan.com, (27 Fevereiru 2024), Díli– Estadus Unidus ho ksolok hato’o parabéns bá Timor-Leste ninia adezaun bá Organizasaun Mundiál Komérsiu (OMK).

Lee Mós: TL Ofisialmente Sai Membru Plenu iha OMK

Estadus Unidus apresia persisténsia Timor-Leste nian no rekoñese susesu boot sira ne’ebé halo ona atu kompleta rekerimentu sira no tempu bá negosiasaun ne’ebé badak – durante tinan hitu nia laran de’it.

Enkarregadu Negósiu Embaixada Estadus Unidus iha Dili, Marc Weinstock. Foto/Espesiál

Komunikadu Imprensa ne’ebé Hatutan.com asesu, Tersa (27/02/2024), haktuir Governu Estadus Unidus apoia ho konsisténsia esforsu Governu Timor-Leste nian atu adere bá OMK iha aspetu oi-oin, inklui liu hosi atividade importante USAID nian, partikularmente USAID niniaaAtividade Governasaun Komérsiu, ne’ebé ajuda Autoridade Aduaneira Timor-Leste hodi moderniza nia sistema komérsiu atu haktuir padraun internasional sira. Apoiu husi USAID nian mós mak hametin transparénsia liu hosi inisiativa sira hanesan Portal Komérsiu Aduaneiru.

 “Estadus Unidus hato’o parabéns ba Timor-Leste nia adezaun bá OMK, marku importante ida atu nasaun ne’e sai hanesan parseiru global estratéjiku liu,”  Enkarregadu Negósiu Embaixada Estadus Unidus iha Dili, Marc Weinstock hateten.

 “Adezaun Timor-Leste nian bá OMK hanesan prova bá nasaun ne’e nia dedikasaun no perseveransa. USAID hamriik hamutuk ho Timor-Leste, apoiu nasaun ne’e nia jornada atu hetan futuru ne’ebé abertu, konektadu, no prósperu,” Diretór Interinu Misaun USAID, Mark White hateten.

 Governu Estadus Unidus, liu hosi USAID, sei kontinua fó asisténsia téknika no kapasitasaun ba Autoridade Aduaneira depois adezaun atu halo alterasaun ba Kódigu Aduaneiru atu kumpre OMK  nia Akordu Fasilitasaun Komérsiu no estabelese Eskritóriu Inkéritu Nasionál.

 USAID mós apoiu elaborasaun lei haat ne’ebé tuir OMK ninia rekerimentu atu promove autonomia telekomunikasaun Timor-Leste ninian. Dezenvolvimentu lejizlasaun telekomunikasaun ne’e kritiku ba abilidade Timor-Leste nian atu atrai investimentu relasionadu ho TIK no mós atu aseita espansaun servisu ne’ebé iha ligasaun ho TIK.

Kona-bá USAID

Liuhosi USAID, Embaixada Estadus Unidus ba Timor-Leste kontribui ona osan hamutuk millaun $92 entre 2021 no 2025, hodi hadi’a ekonomia Timor-Leste nian no promove governasaun di’ak.

Dezde restaurasaun Independénsia Timor-Leste nian, USAID kontribui ona millaun $323 resin hodi promove dezenvolvimentu inkluzivu pasifku atu nasaun ne’e prósperu, saudavel, no autosufisiente.

 Jornalista: Leopoldin de Carvalho