Hatutan.com, (21 Fevereiru 2024), Díli—Tribunál Judisiál Primeira Instánsia Díli (TJPID), deside aplika medida koasaun Aprezentasaun Periódika (AP) semana rua dala ida bá arguidu LS ne’ebé koñesidu ho naran AM tanba komete krime omesídiu ho forma tentadu.

Advogadu privadu, Câncio Freitas.

Advogadu privadu, Câncio Freitas haree katak desizaun ida-ne’e adekuadu tuir duni prossesu ne’ebé mak akontese.

Lee Mós: Kazu Tiru iha Likintae, Ministériu Públiku Promove Krime Rua Hasoru AM

“Ita ko’alia de’it medida koasaun. Ne’e atu assegura de’it oinsa mak arguidu nia prezensa iha investigasaun hodi ita bele haree kazu ne’e akontese iha krime ruma ka la’e. Ne’e hanesan parte ida atu aplika de’it medida koasaun tanba kazu ne’e seidauk remata. Ne’ebé semana rua dala ida ne’e sufisiente,” Câncio Freitas hateten iha Tribunál Judisiál Primeira Instánsia Díli, Kuarta (21/02/2024).

Antes ne’e, Ministériu Públiku (MP) liu hosi Prokuradór Domingos Barreto hateten katak,  iha prossesu investigasaun deskobre duni katak, arguidu ho pistola tiru bá estrada hodi hakanek vítima Abrão dos Reis Smith.

Arguidu AM ne’ebé involve iha kazu tiru iha Likintae, submete bá prosesu primeiru interrogatóriu iha Tribunál Judisiál Primeira Instánsia Díli, Kuarta (21/02/2024). Foto: Tomé da Silva.

Tanba ne’e, nia dehan, arguidu komete krime omesídiu ho forma atentadu iha área Taibessi-Likintae, Suku Lahane Orientál, Postu Administrativu Verra Cruz, Munisípiu Díli, Domingu madrugada, 18 fulan Fevereiru 2024.

Auiguidu AM komete Lei Kódigu Penál artigu 145 no kríme ida tán maka omesídiu no forma atentadu iha artigu 138 konjuga ho artigu 23 no 24 hosi Lei Kódigu Prossesu Penál.

Prossesu primera interrogatóriu ne’e prezide hosi Juiz Singulár José Maria de Araújo, Ministériu Públiku (MP) reprezenta hosi Prokuradór Domingos Barreto, no arguidu hetan asisténsia legál hosi Advogadu Privadu Câncio Freitas.

Jornalista Estajiáriu:  Lazaro Pereira Quefi