Hatutan.com, (22 Janeiru 2024), Vatikanu– Prezidente Repúblika,  José Ramos-Horta ho Sua Santidade Papa Francisco iha preokupasaun hanesan kona-bá situasaun umanidade iha mundu, liu-liu funu iha Myanmar, Ukránia no Gaza ne’ebé afeta bá situasaun ekonomia no pás iha mundu.

Lee Mós : Konfirmadu, Tinan Ne’e Papa Francisco Vizita Timor-Leste

PR Ramos-Horta hasoru malu ho Papa Francisco iha Vatikanu, Segunda (22/01/2024). Foto/Vito Salvadór

Prezidente Repúblika José Ramos-Horta bá jornalista sira iha Roma-Vatikanu, hateten Papa Francisco preokupa mós ho situasaun internasionál, liu-liu bá situasaun iha Myanmar, funu entre Rusia no Ukránia inklui situasaun iha Gaza.

“Ha’u hakle’an ha’u nia análize bá situasaun iha Myanmar bá Sua Santidade Papa Francisco, katak situasaun iha Myanmar ne’e preokupante tebe-tebes, situasaun umanitária katastrofe bo’ot ida ne’ebé situasaun bele sai guerra sivil, ne’e dunik presiza iha mediasaun atu hetan solusaun ida liu husi negosiasaun,” Prezidente Repúblika José Ramos-Horta haktuir.

Jornalista Hatutan.com, Vito Salvadór ne’ebé akompaña vizita Xefe Estadu nian hosi Vatikanu relata katak  fó  hanoin kona-bá situasaun iha Gazah, Ukránia no dívida interna no externa inklui problema sosial, kiak sira, problema ekonomia mundiál no problema sira hotu ne’ebé afeta bá pás iha mundu.

“Ami na’in rua ko’alia mós kona-áa situasaun internasionál liu-liu funu iha Ukránia, Gaza no problema oin-oin ne’ebé afeta bá pás iha mundu hodi halo ekonomia globál sai oin-seluk no afeta áa nasaun no povu oin-oin be inosente,” Ramos-Horta tenik.

Papa Francisco kontinua reza bá pás iha mundu no reza bá familia ida-idak atu sai hanesan mensajeiru dame nian bá sosiedade hodi lori umanidade tomak bá pás, unidade no fraternidade. **