Hatutan.com, (11 Janeiru 2024), Díli—Klube Futeból Timor-Leste AD SLB Laulara derrota 2-0 hasoru klube Northern Crocs iha jogu kontinuasaun Taxa Timor Cup 2023 ne’ebé hala’o iha kampu futeból Melbourne Austrália.

Klube Futeból Timor-Leste AD SLB Laulara derrota 2-0 hasoru klube Northern Crocs iha jogu kontinuasaun Taxa Timor Cup 2023 ne’ebé hala’o iha kampu futeból Melbourne Austrália, Kuarta (10/01/2024). Foto: AD SLB Laulara.

Jogu entre ekipa AD SLB Laulara no Northern Crocs ne’ebé hala’o iha loron Kuarta (10/01/2024) ne’e Jogadór ekipa rua mai ho espíritu no vontade nakonu atu konkista vitória hodi rekolla vitória ba ida-idak nia ekipa.

Lee Mós: Timor Cup 2023, AD SLB Laulara Hakat bá Semi Finál

“Klube AD SLB Laulara lakon ho adversáriu Northern Crocs 2-0 tanba iha primeira parte jogu hahú mosu erru iha area grandeal laran ekipa AD SLB Laulara iha ne’ebé akontese bola maun ka Hands Ball, nune’e arbitu deside fó penalidade ba ekipa adversáriu no ho oportunidade ne’ebé iha ezekutór ekipa Northern Crocs konsege marka uluk golu hodi muda skore 1- 0, hodi lidera provizóriu iha tabela klarifikasaun,” Hatutan.com sita komunikadu.

Ekipa rua mantein ho ritmu jogu no mantein ho ida-idak nia taktika hodi halo balansu ba bola ne’ebé iha no too primeira parte termina laiha tan golu ruma ne’ebé akontese ho nune’e Northern Crocs lidera provizóriu iha primeira parte.

Tama ba segundu parte, ekipa AD SLB kontinua hakas an atu hatama golu, maibé jogadór avansadu sira hosi AD SLB Lualara kontinua lakon oportunidade bola barak, ikus mai ekipa Adversáriu hatama tan golu ida hodi muda skore 2-0.

Ekipa AD SLB Laulara nafatin halo esforsu ho taktika ne’ebé iha no treinadór kontinua halo avaliasaun no subtituisaun ba Jogadór sira hodi hasae intensidade jogu ho ritmu ne’ebé as maibé lina avansadu kontinua falla produz golu.

Ekipa rua mantein ho skore ne’ebé iha ho nune’e too jogu remata ekipa Northern Crocs kontinua lidera ho skor 2-0 enkuantu ekipa AD SLB Laulara obrigadu tenke simu derota no fila ho liman mamuk.

Haree ba asuntu ne’e, Kapitaun AD SLB Laulara, Efren Santos kontinua hato’o agradese ba ekipa SLB maski halo esforsu ataka razada hasoru advérsariu, maibé lakon iha kestaun tekniku no fiziku, tanba klube Northern Crocs nu’udar uma na’in ba Jogu Timor CUP ne’ebé kuaze ninia jogadór mesak kualifikadu mai hosi Eskola Akadémiku iha Austrália iha ona esepriénsia barak liu.

“Jogu ne’e hanesan ita nia sorte mak la iha, tanba iha jogu primeira faze ita lakon ho pinalti 1-0, maibé ita nia ekipa halo nafatin esforsu ataka makas to’o segunda faze mós koko atu hatama golu, maibé lakon bola mak barak. Tanba ida ne’e ida hasoru ekipa uma-na’in, maibé ita nia ekipa la lakon esperansa no kontinua halo esforsu atu tama nafatin semi finais hodi halo preprasaun di’ak liu hasoru klube hirak ne’e,”  Efren Santos hateten hafoin jogu.

Maski lakon ho Northern Crocs, maibé ekipa AD SLB Laulara kontinua hakat ba jogu semi finais hodi hasoru klube jigante seluk iha faze sira tuir mai ba jogu Timor Cup 2023 ne’ebé hala’o iha kampu futeból Melbourne Austrália.

Jornalista: Vito Salvadór