Hatutan.com, (28 Novembru 2023), Díli— Ministra Saúde (MS), Elia dos Reis Amaral ne’ebé prezide serimónia posse bá Xefe Suku eleitu na’in-26 iha Dili, husu atu ukun ho justu, inkluzivu no prósperu durante mandatu 2023 to’o 2030.

Ministra Saúde (MS), Elia dos Reis Amaral prezide serimónia posse bá Xefe Suku eleitu na’in 26 iha Díli, Tersa (28/11/2023). Foto: Tomé da Silva.

Serimónia posse ne’e realiza iha ámbitu komemorasaun loron aniversáriu Proklamasaun Unilaterál Independénsia bá dala-48 (28 Novembru 1975 -28 Novembru  2023), iha resintu administrasaun Munisípiu Díli.

Lee Mós: Ramos-Horta Prefere Tau Osan bá Atividade Suku no Redús Osan bá Deputadu Sira

Ministra Elia Amaral dezafia xefe suku eleitu sira ho membru konsellu suku, xefe aldeia, delegadu no delegada sira, iha munisipiu Dili atu hatudu kompromísu ida ne’ebé hatuur hikas prinsípiu hirak fundamentál, ne’ebé sai hanesan rin bá Timor-Leste nia rejíme demokrátiku, no bá objetivu hirak ne’ebé mak estratéjiku hodi promove dezenvolvimentu nasionál.

“Imi nia kompromísu la’ós de’it atu kaer kna’ar ne’ebé imi simu, maibé tanba misaun lulik ida, atu serví no hatudu dalan bá ema hirak ne’ebé pertense bá imi nia komunidade lokál,” Elia Amaral hateten.

Nia fó hanoin katak, lider komunitáriu sira maka hala’o funsaun hanesan intermediáriu, ne’ebé esensiál entre saida mak ninia komunidade hakarak atu hetan, no saida mak instituisaun sira iha Governu atu hala’o.

“Bainhira imi fasilita diálogu, hato’o nesesidade hirak hosi komunidade no promove partisipasaun sívika, iha ámbitu kada komunidade lokál nian, maka imi haforte ona aliserse hirak bá harii ita nia demokrásia,” nia afirma.

Tanba partisipasaun ativa hosi sidadaun sira maka sai forsa ne’ebé dudu bá oin sosiedade ne’ebé prósperu.

Bainhira lideransa komunitáriu kria oportunidade sira hodi involve membru hotu iha sira nia komunidade, maka sira bele hametin ona, la’ós de’it lejitimidade iha desizaun hirak ne’ebé foti, maibé mós sira hafutu metin liután sira-nia aan bá komunidade.

Ministra Elia Amaral, konvida empossadu sira atu hateke bá futuru ho laran ida nakonu ho optimizmu, hodi tau iha ulun katak, kada dezafiu ne’ebé sira hasoru no hakat liu ona, sei halo sira sai forte liután no tuba rai-metin liután.

Nia lori Governu nia naran agradese bá kompromísiu ne’ebé ohin emposadu sira hasán. Atu sira nia lideransa bele hakat tuir dalan integridade, responsábilidade, justu no dedikasaun bá nasaun Timor-Leste.

Xefe suku sesante Bidau-Lesidere, Luís Rebelo Soares Pereira agradese bá konfiansa tomak hosi komunidade ne’ebé mak durante fó ona fiar bá sira hodi ukun iha sira-ninia mandatu. Agradese liután, tanba durante mandatu iha kooperasaun di’ak tebtebes hosi komunidade hotu.

Xefe Suku Bairru-Pité, Joaninha Alves Pereira. Foto: Tome da Silva.

Nune’e mós Xefe Suku eleita iha Bairru-Pité, Joaninha Alves Pereira, reprezenta xefe suku na’in-26 ne’ebé eleitu, aproveita biban ne’e reprezenta mós xefe aldeia sira ho estrutura tomak munisipiu Dili, hato’o agradese wa’in, tanba fó ona sira nia votus konfiansa atu sai líder lokál iha komunidade nia leet.

“Iha fatin ida-ne’e ami promete, hala’o ami nia kna’ar tuir Lei haruka no serví iha ami nia tempu saida de’it,” Joaninha Alves Pereira hateten.

Dadus hosi STAE, suku foun 10 iha territóriu nasionál ne’ebé seidauk realiza eleisaun bá órgaun suku nian mak hanesan, suku foun lima iha Dili, rua iha Aileu, rua iha Manatuto no ida iha Viqueque.

Jornalista: Rogério Pereira Cárceres