Hatutan.com, (18 Outubru 2023), Díli– Provedoria dos Direitus Humanus no Justisa (PDHJ) sei la tolera bainhira identifika duni katak, kargu xefia ka superiór sira  balun iha Polísia Sientífika Investigasaun Krimínal (PCIC) ne’ebé deskonfia komete iregularidade no abuzu poder, fó pistola ba oan hodi treinu.

Lee Mós: Deskonfia Irregularidade no Abuzu Podér, Vicente: PCIC La Preokupa

Provedór dos Direitos Humanos e Justiça, Virgílio da Silva Guterres ‘Lamukan’. Foto/Elio dos Santos da Costa

Provedór PDHJ, Vígilio Guterres hateten, too ohin loron, PDHJ sedauk simu keixa PCIC nian kona-bá iregularidade no abuzu poder ne’ebé komete husi kargu xefia balun,  maibé provedor hatene katak, informasaun ne’e la’o.

“Hau hanoin, emtermu sukat ho sensu komún, ida-ne’e ita latolera bainhira identifika duni,” Vígilio Guterres, hateten bá Jornalista sira bainhira partisipa Konferensia Internasionál kona-ba “Promove Labarik sira-nia Moris-di’ak no Dezenvolvimentu Optimu iha Timor-Leste” ne’ebé hala’o iha Timor Plaza, Kuarta (18/10/2023).

Provedór PDHJ ne’e afirma  atu buka hatene ne’e, depende entidade kompetente ne’ebé tuir leí atu halo averiguasaun bá asuntu ne’e rasik, katak informasaun sira ne’e loos duni hanesan  ne’e ka lae. Tanbá informasaun hirak ne’e sei konsidera nia nivél  hanesan rumoris hela, parte investigasaun nian maka tenke iha esforsu no medida atu konfirma asuntu ne’e loos duni ka lae.

Bainhira kexai ne’e to’o iha PDHJ, Virgílio Guterres hateten, sei follow-up hanesan mós provedoria ne’ebé iha kompetensia atu promove Boa Governasaun, iha komunikasaun formál ka in-formál ho entidades kompetente no sei hatoo preokupasaun ida ne’e. Liu-liu kuandu hatene rumoris ne’ebé rona loos duni.

“Primeiru maka ita  tenke hatene lai informasaun ne’e loos duni ka lae, tanba fotografia ka imajen sira neebé maka fó sai, loos duni ka lae, keta montase de’it, entau ita persija haree auténtiku  huoi informasaun sira ne’e. Bainhira konfirma katak, informasaun ne’e loos maka, entidade hotu tenke halo intervensaun, liu-liu provedor sei halo intervensaun bazeia bá kompetensia ne’ebé lei fó atu garantia boa Governasaun,” nia afirma.

Tuir Vigílio Guterres, koalia kona-bá Boa Governasaun nian, ida ne’e tanba bá abuzu de poder, kuandu ema ruma  nia pozisaun ne’ebé boot, tenke akompaña mós  nia kontensaun, katak kapasidade atu kontrola  nia familia atu labele asesu bá sasan Estadu nian ne’e inportante tebes.

“Iha ona esperiensia katak, iha member upolísia balun, husik hela pístola depois nia oan sira hodi halimar, ikus mai mosu asidente oan sira tiru malu ida tenke mate, ida-ne’e sai ona referensia bá ita atu proteze ita nia oan sira hosi kilat,” Provedór Virgílio Guterres fó hanoin.

Jornalista: Gloria Maia