Hatutan.com, (09 Outubru 2023), Díli—Governu Repúblika Populár Xina iha komitmentu bo’ot atu kontinua tulun dezenvolvimentu iha Timor-Leste (TL) liu-liu iha área edukasaun, saúde no Infraestruturas.

Prezidente Repúblika, José Ramos-Horta simu karta kredensiál hosi Embaixadóra foun Xina nian, Wang Wenli, iha Palásiu Prezidensiál Nicolau Lobato Bairr-Pité, Segunda (09/10/2023). Foto: Elio dos Santos da Costa.

Vise-Ministra Assuntu ASEAN, Milena Maria da Costa Rangel hato’o assuntu ne’e, hafoin akompaña Prezidente Repúblika, José Ramos-Horta simu karta kredensiál hosi Embaixadóra foun Xina nian, Wang Wenli, iha Palásiu Prezidensiál Nicolau Lobato Bairr-Pité, Segunda (09/10/2023).

Lee Mós: Hasoru Xi Jinping, Xanana Agradese Apoiu Xina Durante Ne’e

Ho karta kredensiál ne’ebé Embaixadora foun Xina nian mai entrega ne’e, hanesan kontinuasaun ba servisu ida ne’ebé durante ne’e Enkarregadu Negósiu Xina nian halo hela durante fulan hirak nia laran, no ohin bele iha ona Embaixadora foun ne’ebé dezignadu mai iha Timor-Leste no ida-ne’e atu hametin liután kooperasaun servisu entre país rua.

Embaixadóra foun Xina nian, Wang Wenli, entrega karta kredensiál bá Prezidente Repúblika, José Ramos-Horta iha Palásiu Prezidensiál Nicolau Lobato Bairr-Pité, Segunda (09/10/2023). Foto: Elio dos Santos da Costa.

“Nasaun rua iha komitmentu forte atu hametin liután kooperasaun no kontinua servisu bilaterál ne’ebé eziste hela no bele hametin liu tán implementasaun programa sira ne’ebé la’o hela iha área edukasaun, saúde, no Infraestruturas ne’ebé durante ne’e ita servisu hamutuk ona,” Milena Maria da Costa Rangel hateten.

Prezidente Repúblika José Ramos-Horta kontente ho karta kredensiál ne’ebé Embaixadora foun Xina Wang Wenli entrega, tanba ida-ne’e atu hametin liutan relasaun bilaterál ne’ebé eziste forte tebes ho país amigu hotu-hotu inklui nasaun Xina rasik.

Jornalista: Vito Salvadór