Hatutan.com, (04 Outubru 2023), Díli—Bankada Opozisaun FRETILIN iha Parlamentu Nasionál (PN) hakarak konsensu iha eleisaun bá Komissáriu Comissão Anti Corrupção (CAC), maibé Governu tenke aprezenta kandidatu ida de’it la’ós kandidatu ema na’in-rua.

Kandidatu Komiisáriu CAC, Sérgio de Jesus Fernandes da Costa Hornai ho Rui Pereira dos Santos. Foto repro.

“Prossesu ne’e ami hateten ona bá Bankada CNRT no Bankada Governu sira. Ami sei ba partisipa iha eleisaun komissáriu CAC nian bainhira iha kandidatu ida de’it. Maibé bainhira iha nafatin kandidatu rua não vale a pena. Signifika laiha konsensu,” Xefe Bankada FRETILIN, Aniceto Guterres hateten bá Jornalista Hatutan.com iha sala Bankada nian iha PN, Kuarta (04/10).

Lee Mós: PN Seidauk Bele Hili Komisáriu CAC

Realidade maka, Aniceto dehan, agora daudaun Governu iha ona kandidatu ema na’in-rua hanesan Sérgio de Jesus Fernandes da Costa Hornai ho Rui Pereira dos Santos hodi ba lidera CAC, nune’e Bankada FRETILIN sei la bá partisipa bainhira Governu mantein ho kandidatu rua ne’e.

Xefe Bankada FRETILIN,Aniceto Longuinhos Guterres Lopes.

“Iha polítika ami iha pozisaun ida atu bá apoiu kandidatu ida ne’ebé maibé agora entre kandidatu na’in-rua ne’e mak ida hetan ona apoiu hosi partidu boot sira iha Parlamentu Nasionál, entaun ida seluk ne’e mantein tán hodi halo saida. FRETILIN entende iha objetivu ida atu hetan konsensu, se konsensus ona ida seluk mantein atu halo saida, liuliu ida la hetan apoiu ne’e,” nia kestiona.

Tanba ne’e, Xefe Bankada FRETILIN ne’e propoin atu bainhira kandidatu ida hetan ona apoiu, ida seluk tenke retira, depois hakat ba eleisaun hanesan apenas atu formaliza de’it konsensu, nune’e bele hetan ninia mensajen ne’e dehan katak, Komissáriu ne’e eleitu ho konsensuál.

Lee Mós: Xanana Gusmão Propoin Sérgio Hornai ho Rui Pereira bá Komissáriu CAC

Jornalista Estajiáriu: Lazaro Pereira Quefi