Hatutan.com, (10 Agostu 2023), Díli- IX Governu Konstitusionál liu husi Vise-Ministru Asuntu Parlamentár, Adérito Hugo submete ona Orsamentu Retifikativu (OR) ho valór US$ 1.771.867.112 bá Parlamentu Nasionál.

Lee Mós : Orsamentu Retifikativu $1.771.867.112 Aprovadu

Osan Dolar Amérika. Foto/Google.

Vise-Ministru Asuntu Parlamentár, Adérito Hugo da Costa, ba jornalista sira iha Parlamentu Nasionál, Kinta (10/08/2023), hateten tuir IX Governu Konstitusionál nia kompromisu katak sei submete Orsamentu Retifikativu mai iha Parlamentu Nasionál iha loron 10 fulan-Agostu ne’e no kumpre duni kompromisu no aguarda ho ajenda Parlamentu Nasionál nian para atu debate.

“Iha proposta Orsamentu Retifikativu halo mós alterasaun bá lei enkuadramentu orsamentál no mós lei tributária nian, para atu tradús  medida foun iha orsamentu retifikativu ida mak hadi’a sistema no ida seluk mak atu fó resposta bá kompromisu ne’ebé halo ona mak hatún taxa importasaun hosi 5% mai 2,5%,” Vise-Ministru Asuntu Parlamentár Adérito Hugo da Costa hateten.

Tuir nia, regra normal bá debate orsamentu retifikativu ne’e kompeténsia Parlamentu Nasionál tamba ne’e Governu nia obrigasaun lori mai PN no hein reprezentante povu sira nia desizaun atu hahú debate bainhira maibé sei la’o tuir nafatin lei no regulamentu sira ne’ebé Parlamentu Nasionál iha.

Prezidente Parlamentu Nasionál ein-ezersísiu, Deputadu Alexandrino Afonso Nunes hateten Parlamentu Nasionál simu ona proposta orsamentu no sei submete baáiha komisaun C Parlamentu Nasionál para halo paresér iha oras 24 nia laran depois lori bá plenária atu delibera no baixa ba konferénsia bá reprezentante líder bankada siras hodi haree ajenda bá diskusaun nian.

“Durasaun bá debate orsamentu retifikativu ne’e tuir tempu normal ne’e iha jeneralidade loron tolu no espesialidade bele loron 10 maibé se kuandu ho karater urjénsia bele iha mudansa depende bá lider bankada sira deside,” Alexandrino Afonso Nunes esplika.

Vise Prezidente Parlamentu Nasionál ne’e subliña Segunda ba oin,  bele haree atu hahú debate, tamba orsamentu retifikativu mós presiza atu lalais liga ho situasaun ne’ebé povu enfrenta ka labele metin hela de’it maibé diskusaun tenke la’o ona.

Jornalista: Vito Salvadór