Hatutan.com, (09 Agostu 2023), Díli—Polítika IX Governu Konstitusionál klaru ona katak, sei reativa hikas membru Polísia Nasionál Timor Leste (PNTL) reformadu na’in-158 bá servisu nune’e sei buka rezolve uluk sira-nia saláriu fulan-tolu nian.

“Sira tenke tama fila-fali. Primeiru maka ne’e, reativasaun sira-nian saláriu no rezolve sira-nia problemas barak. Ami buka solusaun, kestoens legais, ami prepara lei, prepara sira nia reforma,” Ministru Interior (MI), Francisco Maria Guterres hateten, hafoin partisipa iha sorumutu ordináriu Konsellu Ministru nian, iha Palásiu Governu, Díli, Kuarta (09/08/2023).

Lee Mós: Komandu PNTL Sei Reativa Hikas Membru Reformadu Na’in-158

Fulan-ida tán Governu bele rezolve ona problema ne’ebé membru reformadu sira hasoru, tanba oras ne’e sei iha Konsellu Ministru, maibé parte tékniku sira ministériu nian trata hela assuntu ka dokumentu sira.

Desizaun Governu nian atu re-ativa fali membru reformadu sira ne’e la kontra Lei ruma, nune’e Governu hakarak atu halo tratamentu bá reformadu sira ho dignu molok integra hikas ba iha komunidade nia leet.

Serimónia despedida bá membru PNTL na’in-158 ne’ebé idade kompleta ona tinan 60 atu fila bá vída sivíl hala’o iha Sentru Formasaun Polísia nian (CFP-Sigla Português), iha Comoro, Díli, 16 Juñu 2023.

Jornalista: Rogério Pereira Cárceres