Hatutan.com, (19 Jullu 2023), Díli—Bankada Parlamentár Kmanek Haburas Unidade Nasionál Timor Oan (KHUNTO), liuhosi Deputadu António Verdiál deklara sei fó votus a-favór bá programa IX Governu Konstitusionál nian, maibé husu mós atu halais polítika desentralizasaun administrativa.

Deputadu António Verdial. Foto/Elio dos Santos da Costa.

Pozisaun politika no rekomendasaun ida-ne’e, Deputadu Verdial hato’o, liu hosi apresiasaun KHUNTO nian bá programa sira ne’ebé aprezenta ona hosi Governu, durante debate loron daruak nian iha plenária Parlamentu Nasionál, Kuarta (19/07/2023).

Lee Mós: Diskursu Primeiru Ministru, Kay Rala Xanana Gusmão Durante Aprezentasaun Programa IX Governu Iha PN

“Ho esperansa katak, partidu KHUNTO sei fó votus ida ne’ebé di’ak, nune’e Governu bele halo dezenvolvimentu. Keta haluha, polítika desentralizasaun administrativa, ida-ne’e tenke la’o,” António Verdial hateten.

Deputadu ne’e mós halo ona leitura bá programa sira Governu ne’e nian, halo nia kontente no satisfás tebes, tanba iha área sira infra-estrutura nian, nia hatene katak, IX Governu Konstitusionál haree planu estratéjiku dezenvolvimentu, nu’udár estratejia di’ak hodi bele rezolve problema infra-estrutura, problema kapasidade no seluk tán.

Reprezentante bankada KHUNTO ne’e haree katak, planu ida-ne’e mai ho objetivu tinan 2011 to’o 2030, sei garante populasaun iha territóriu nasionál, sei asesu infra-estrutura bázika.

KHUNTO fiar katak, programa Governu nian ne’e sei fó fornesimentu bee-moos ne’ebé di’ak, asesu estrada ne’ebé di’ak no seguru, komunidade iha área rurál sei asesu bá enerjia eletrisidade, ema hotu sei asesu bá tratamentu saúde no edukasaun. Asesu internet, liuhosi wireless nasionál bá ema hotu no laiha ki’ak.

Deputadu KHUNTO ne’e fó hanoin bá membru Governu sira IX Governu Konstitusionál nian, atu ajuda Primeiru Ministru (PM), José Alexandre Kay Rala Xanana Gusmão, nune’e bele aselera prosesu dezenvolvimentu iha rai-laran.

“Husu bá membru IX Governu Konstitusionál, atu suporta ita-nia Primeiru Ministru Maun boot Kay Rala Xanana Gusmão, hodi lori dezenvolvimentu ne’e bá ita-nia povu,” nia fó hanoin.

Hanesan reprezentante povu, Verdiál apresia bá programa neen (6) hosi Governu mak hanesan (1) Atu reafirma fali Estadu direitu demokrátiku, (2) dezenvolvimentu kapitál sosiál, (3) dezenvolvimentu kapitál infra-estrutura, (4) dezenvolvimentu kapitál ekonomia, (5) konsolidasaun governativa no (6) Boa-Governasaun.

Bankada KHUNTO hein katak, proxima sesoens no ajenda ezekutiva no lejislativa, sai útil no produtiva bá nasaun, nune’e mós bá bem-estár povu timorense ninian. Ida-ne’e oportunidade únika bá Timoroan tomak, órgaun ezekutiva no órgaun lejislativa, hamutuk serví RDTL.

“Ami kontente no hein ho esperansa boot katak, iha tinan lima ne’e ita bele halo buat ida ne’ebé lori satisfasaun bá povu Timor-Leste,” Verdial  hateten.

KHUNTO haree katak, instrumentu polítiku lima (5) ne’ebé hetan asentu iha uma-fukun PN, forsa tebes, domina hosi bankada Governu ne’ebé forma hosi CNRT ho PD.

Hanesan deputadu, Verdial husu ho hakraik aan, atu apura ho balansu ka tetu ne’ebé aas, étika, atu nune’e, labele rai hela kultura negativu, ódiu no vingansa ne’ebé opozisaun fila hodi kontra buat hotu, ka inisiativa tomak.

Partidu KHUNTO, lakohi parlamentu ida-ne’e monu iha dalan klaran, iha ninian mandatu. KHUNTO hakarak lejislatura ida ne’ebé eziste no dura to’o fim mandatu tinan-lima. Alende-ne’e, sira mós respeita bá koligasaun majoritáriu hosi partidu CNRT no PD, ne’ebé iha podér ezekutiva.

“Ami sei apoia órgaun ezekutivu nia mandatu hodi serví nasaun, moris bá povu ida-ne’e, espesialmente, atu hasai povu hosi mukit no ki’ak. Ami tau esperansa boot bá IX Governu Konstitusionál, ne’ebé lideradu hosi komandante Em Xefe das FALINTIL Maun-boot Kay Rala Xanana Gusmão,” Verdial subliña.

Jornalista: Rogério Pereira Cárceres