Hatutan.com, (04 Jullu 2023), Díli– Primeiru-Ministru  (PM), Kay Rala Xanana Gusmão, fó orientasaun bá Ministériu Obras Publika (MOP), Instituto de Gestão de Equipamentos e Apoiu ao Desenvolvimento Infrastruturas, Instuto Público  (IGEADI, I.P) no Ministériu Solidaridade Sosiál no Inkluzaun (MSSI) halo intervensaun direita bá estrada no ponte hirak ne’ebé kotu, inklui buka dalan salva populasaun hosi risku dezastre naturál ne’ebé akontese, hafoin udan-bo’ot iha loron hirak ne’e nia laran.

Lee Mós : Dezastre Naturál Hamate Ema Na’in-20 no Estraga Uma 1.199

Udan ho intensidade maka’as hamosu inundasaun to’o tama komunidade sira-nia horik fatin. Foto/Foti hosi Facebook

Komunikadu imprensa ne’ebé Hatutan.com asesu hosi Mídia Gabinete Primeiru-Ministru IX Konstitusionál nian, Tersa (04/07/2023), relata katak,  Xefe Governu husu atu ekipa MOP-IGEADI atu mobiliza ekipamentu pezadu tun direita bá área hirak ne’ebé sai risku hodi suru sai rai hirak ne’ebé monu taka estrada.

Bá asuntu ida-ne’e rasik, Ministru Obras Publika, Samuel Marçal relata katak, udan no anin makas akontese iha teritóriu Timor-Leste afeita bá estrada no ponte kiik balun kotu.

Ekipa MOP-IGEADI desloka ona bá terenu, hodi halo levantamentu áa estragu sira hanesan, estrada Eralessu Suku Molo, Postu Hatubuilico,  Munisípiu Ainaro nian ponte kiik no estrada baluk kotu totál no iha Suku Aituto Maubisse rai monu taka dalan.

“Dadaun ne’e Primeiru Ministru Xanana prepara ona programa Governu nian, tanba ne’e mak fó ona orientasaun bá MOP-IGEADI no Ministériu Obras Publiku iha munisípiu sira atua hela situasaun, maibé seidauk bele halo asaun ruma, tanba hein udan been para tiha maka foin bele halo asaun, maibé ekipa prepara ona iha terenu hodi halo intervensaun para salva uluk vitima sira ne’ebé uma hetan estragus,”  Ministru Samuel Marçal haktuir bá jornalista iha Palasiu Governu.

Nia hatutan, udan ho intesidade moderadu sei kontínua akontese, ho nune’e, Xefe Governu orienta salva uluk populasaun nia vida.

“Tuir orientasaun  Primeiru-Ministru nian ekipa bá uluk iha terenu buka salva uluk populsaun sira  hosi risku ne’ebé lori dezastre no estragus oin-oin,” Ministru Samuel Marçal hateten.

Udan ho intensidade maka’as hamosu inundasaun to’o tama komunidade sira-nia horik fatin. Foto/Foti hosi Facebook

Ekipa MOP-IGEADI identifika iha Ponta Leste, Lautem Ponte Api-Kuru ameasa kotu, tanba mota boot sobu moru protesaun kuaze hetan estragus.

Ekipa rekolla ona dadus iha estrada diresaun Lehulolo, Aitutu, Same, ligasaun Ainaro mós ponte ki’ik ida kotu no estrada Holarua parte Tangue da Guterra ameasa kotu no dadaun ne’e governu lokál koordena ho Komandu PNTL no Bombeiru hodi halo intervensaun.

Iha Munisípiu Viqueque mós udan halo rai monu taka estrada públiku no ameasa estraga  uma nian ne’ebé harii besik mota ninin.

Dezastre naturál ne’e afeita mós ba uma komunidade nian lubuk ida hetan estragus no ekipa Governu liuhosi MSSI dadaun rekolla hela dadus iha terenu hodi prepara ona kondisaun atu apoia vítima sira.

Dezastre naturál ne’e mós rezulta riin eletrisidade monu iha Suku Casa, Postu Ainaro Vila, hodi halo liña eletrisidade iha Postu Administrativu Maubissi, Hatubuliku, Turiskai mate totál.

Lee Mós : Ministru Samuel Marçal Sei Halo Inspesaun bá Projetu Estadu Ne’ebé La’o Hela no Balun Laiha Kontratu

Jornalista : Rogério Pereira Cárceres