Hatutan.com, (30 Juñu 2023), Díli—Prezidente Repúblika (PR), José Ramos-Horta konsidera Primeiru Ministru (PM) indijitadu, Xanana Gusmão ho Primeiru Ministru (PM) sesante, Taur Matan Ruak atu hasoru-malu, la presiza ema ruma atu sai hanesan mediadór.

Prezidente Repúblika (PR), José Ramos-Horta hasoru malu ho ho Primeiru Ministru (PM) indijitadu Kay Rala Xanana Gusmão no eis Primeiru Ministru (PM) Taur Matan Ruak, hodi ko’alia kona-bá tranzisaun Governu iha Palásiu Prezidensiál Bairru-Pité, Sesta (30/06/2023). Foto/Elio dos Santos da Costa.

Ramos-Horta deklara asuntu ne’e hafoin simu audiénsia ho Kay Rala Xanana Gusmão no Taur Matan Ruak, hodi ko’alia kona-bá tranzisaun Governu iha Palásiu Prezidensiál Bairru-Pité, Sesta (30/06/2023).

“Líder na’in-rua ne’e nunka presiza ema ruma atu halo sira hamutuk. Tempu sei to’o ba sira atu hamutuk duni. Sira hanesan lutadór bo’ot rua ba nasaun no povu ida-ne’e. Ida hanesan ema ne’ebé estratéjiku no ida seluk nu’udar tátiku militár. Sira na’in-rua iha vida polítika riku tebe-tebes ho esperiénsia iha tinan 20 ba konstrusaun Estadu,” Ramos-Horta subliña.

Xefe Estadu agradese bo’ot bá Taur Matan Ruak bá tempu ne’ebé nia kaer todan nu’udár Primeiru Ministru, situasaun difísil iha rai laran no ohin ho maun bo’ot Xanana bele hasoru-malu, ko’alia nu’udár Primeiru Ministru sesante no Primeiru Ministru foun atu iha hand over ne’ebé sei halo liga ho relatóriu, dokumentu, no buat hotu-hotu prontu hosi VIII Governu konstitusionál ba nonu governu.

“Primeiru Ministru sesante hateten ona no fó órden ona bá Ministru sira ne’ebé atu sai ne’e, katak, bainhira Ministru foun sira presiza atu esklarese buat ruma, sira tenke disponível nune’e servisu hamutuk ida di’ak, atu tranzisaun ba governu foun ne’e la’o di’ak,” Ramos-Horta hateten.

Tuir Ramos-Horta, bá futuru eis Primeiru Ministru Taur Matan Ruak sempre disponível atu apoia governu, atu iha enkontru ruma ka forum ruma presiza rona Primeiru Ministru Taur Matan Ruak nia opiniaun, nia prontu atu kontribui.

Iha fatin hanesan, Primeiru-Ministru indijitadu, Kay Rala Xanana Gusmão hateten, Prezidente Repúblika ko’alia hotu ona kona-bá saida mak ko’alia iha leten nune’e la presiza atu esplika tán.

Nune’e mós iha espresaun durante enkontru entre líder na’in tolu ne’e, Taur Matan Ruak hateten durante ne’e maski dook iha matan, maibé sempre besik iha fuan.

“Dook iha matan, besik iha fuan,” Taur Matan Ruak ho oin kontente no hamnasa midar bainhira espresa lia fuan ne’e ho lian Indonézia.

Jornalista: Vito Salvadór