Hatutan.com, (26 Juñu 2023), Díli—Postura Governu da-sia ne’ebé lidera hosi Primeiru-Ministru (PM), Kay Rala Xanana Gusmão, sei involve membru Governu besik na’in-50.

Prezidente CNRT, Kay Rala Xanana Gusmão konversa ho Sekrétariu Jerál CNRT, Francisco Kalbuadi Lay. Foto/Dok.Espesiál

Fontes importante Hatutan.com nian iha partidu Congressu Nasionál Rezisténsia Timorense (CNRT) haktuir, membru Governu iha Govenu Koligasaun CNRT-PD ne’e nia kompozisaun ema besik na’in-50.

Lee Mós: CNRT-PD Forma IX Governu, Xanana: Tenke Servisu Makas

Ema sira okupa posizaun ezekutivu ne’e nia komposzisaun, mak hanesan Primeiru-Ministru, Kay Rala Xanana Gusmão, Vise-Primeiru Ministru na’in-rua (2), Ministru na’in-ualu (8), Vise-Ministru mós na’in-ualu (8) no ema liu na’in-30 okupa kargu hanesan Sekretariu Estadu sira.

“Maun-boot Xanana hakarak membru Governu barak, liu ema na’in- 40 ka besik ema na’in-50.  Ne’e la’ós tanba hakarak fahe pozisaun ukun,” fontes ne’ebé husu atu labele publika nia identidade hateten bá Hatutan.com iha Díli,s Segunda (26/06/2023).

Nia haktuir, baze fandamentu bá maun-boot Xanana hodi involve ema barak besik na’in-50 iha Governu ne’ebé nia lidera atu tau ema iha área espesífiku ida-idak nian atu servisu bá mudansa. 

“Ita haree tinan lima bá kotuk kuaze sasán sira paradu. Povu halerik bá buat hotu. Laiha dezenvolvimentu ida signifikante bá povu nia moris di’ak. Tanba ne’e, maun-boot Xanana tau ema barak atu haree no foku bá idaidak nia área hodi halo dezenvolvimentu iha seitór hotu-hotu atu povu bele sente dezenvolvimentu iha tinan-lima ne’e nia laran,” fontes ne’e hateten tán.  

Membru Governu da-sia periódu 2023-2028 lidera hosi Primeiru-Ministru (PM), Kay Rala Xanana Gusmão, sei simu posse iha loron 01 fulan-Jullu 2023 iha Resintu Palásiu Prezidensiál, Aitarak-Laran, Díli.

Kona-bá lista hosi kompozisaun ne’e, fontes ne’e deklara katak, to’o agora seidauk iha lista fixu tanba sei iha nível diskusaun entre partidu rua.

Jornalista: Vito Salvadór