Hatutan.com, (19 Juñu 2023), Díli—Partidu Congresso Nasionál Reconstrução Timorense (CNRT) liu hosi konferénsia nasionál deside ho unanimidade halo koligasaun ho Partidu Demokrátiku (PD), hodi hetan maioria Parlamentár no hakat ba formasaun IX Governu Konstitusionál.

Konferénsia nasionál Partidu CNRT ne’ebé hala’o iha salaun OKA, Surik Mas, Segunda (19/06/2023). Foto/Elio dos Santos da Costa.

Konferénsia nasionál Partidu CNRT ne’ebé hala’o iha salaun OKA, Surik Mas, Segunda (19/06/2023) taka ba média, maibé hafoin diskusaun no tama ba votasaun média sira assesu hikas ho rezultadu hatudu maioria Konferesista deside fó apoiu tomak ba koligasaun entre partidu CNRT no PD hodi ba kaer ukun atu bele servi povu tuir kompromisu polítiku ne’ebé iha.

Lee Mós: Konferénsia partidu CNRT, Xanana Hato’o Omenajen bá Luís Lobato no Isabel Ferreira

Prezidente Partidu CNRT, Kay Rala Xanana Gusmão fó obrigadu barak ba konferensista sira ne’ebé ho hanoin ida de’it halo desizaun ba partidu CNRT hodi la’o hamutuk ho Partidu Demokrátiku ba formasaun IX Governu Konstitusionál.

“Prontu. Obrigadu barak ba konferensista sira. Ne’e katak, partidu konkorda por unanimidade ba koligasaun ho PD bá formasaun IX Governu Konstitusionál.” Kay Rala Xanana Gusmão agradese.

Xanana Gusmão husu bá militante, simpatizante no apoiante sira atu kontinua servisu hodi prepara-an ba eleisaun sira ne’ebé sei mai, hametin kuadru partidu CNRT nian iha baze atu partidu la’ós manán de’it eleisaun maibé servi povu tuir prinsípiu sira ne’ebé partidu hatur ba dezenvolvimentu nasionál no Dezenvolvimentu rekursu umanu Timoroan sira hotu nian.

Xanana Gusmão dehan,  hanoin boot liu ne’ebé kuadru, militante no simpatizante sira CNRT nian tenke tau iha hanoin mak atu servi rai no povu ida-ne’e,  lori povu ba moris di’ak, moris ho dignu hodi goza ukun an.

“Iha tinan lima ne’e sei la fásil, atu dehan karik ba imi atu komprende katak iha 2007 CNRT ba kaer ukun buat hotu bou de’it, lori tinan rua ka tolu atu hadi’a. Hadi’a katak harii tanba ne’e ohin ita deside depois de posse ba membru governu sei difisil liu,” Xanana subliña.

Difisil tanba sistema sira ne’ebé antes ne’e iha, governu muda tiha ne’ebé IX Governu Konstitusionál sei la fásil atu ba tur de’it sai Ministru fásil maibé atu kumpri misaun servi rai no povu ida-ne’e difísil tebe-tebes no sei hatutan tán ba koordenadór munisípiu sira tanba iha tinan lima ne’e tenke hahú desentralizasaun tanba ne’e tenke prepara an buka hatene no koñese difikuldade inklui potensialidade kada munisípiu.

Xanana mós husu atu iha munisípiu sira, kuadrus partidu nian hahú halibur forsa politika hodi halo diskusaun kona-bá atu dezenvolve munisípiu, la’ós ne’e de’it maibé diskute área hotu ne’ebé kobre munisípiu sira nune’e tempu to’o atu ko’alia hotu-hotu preparadu iha rekursu umanu no tékniku ne’ebé involve seitór privadu sira.

Iha fatin hanesan, Sekretáriu Jerál Partidu CNRT, Francisco Kalbuadi Lay esplika, konferénsia nasionál ne’e partisipa hosi kuadru sira, estrutura nasionál, koordenadór munisípiu 13 no RAEOA, koordenadór postu administrativu no estrutura tomak.

Kalbuadi konta tuir katak, durante konferénsia, meza ho permisaun Prezidente Partidu CNRT, Kay Rala Xanana Gusmão atu husu ba konferensista sira hanesan órgaun ida ne’ebé aas liu no iha desizaun ne’ebé aas liu tuir Lei Eleitorál, nune’e mós estatutu foun partidu nian, se mak konkorda no la konkorda atu partidu CNRT halo koligasaun ho Partidu Demokrátiku ba formasaun IX Governu Konstitusionál.

“Prontu, komisaun verifikasaun verifika, hotu-hotu konkorda no ita avansa ba koligasaun ho PD ba formasaun IX Governu Konstitusionál,” Kalbuadi hateten.

Antes ne’e mós PD hala’o ona konferénsia nasionál hodi hola desizaun polítika partidu nian atu halo koligasaun ho Partidu CNRT, hodi kontinua servi povu no hasai povu hosi mukit liu hosi dezenvolvimentu nasionál ne’ebé integradu iha seitór hotu-hotu.

Jornalista: Vito Salvadór