Hatutan.com, (14 Juñu 2023), Díli—Prezidente Repúblika (PR), José Ramos-Horta ba hala’o medical Check-Up iha Darwin-Austrália bá rekoperasaun saúde.

Prezidente Repúblika José Ramos-Horta ba hala’o medical Check-Up iha Darwin-Austrália ho aviaun TL701, Tipu Embraer E120 Brazilian, Registtasaun VH-ANN, Kuarta (14/06/2023). Foto/Espesiál.

Tuir informasaun ne’ebé Hatutan.com assesu, Prezidente Repúblika José Ramos-Horta ba halo medical Check-Up iha Darwin-Austrália ne’e ho aviaun TL701, Tipu Embraer E120 Brazilian, Registtasaun VH-ANN.

Lee Mós: Prezidente Repúblika José Ramos-Horta Moras

Aviaun Airnort hosi Darwin-Austrália ne’e to’o iha aeroportu internasionál Prezidente Nicolau dos Reis Lobato iha oras 11:00 Otl no  semo fila ba Darwin iha tuku 12:06 otl.

Tuir fontes konfirmadu iha Aeroportu Internasionál Prezidente Nicolau dos Reis Lobato rekoñese katak,  loos duni Prezidente Repúblika José Ramos-Horta ba tiha ona Darwin-Austrália hodi halo medical Check-Up.

“Prezidente Repúblika José Ramos-Horta ba tiha ona ohin jam 12 ne’e,” Hatutan.com sita deklarasaun fontes ne’ebé lakohi temi nia identidade iha Aeroportu Comoro.

Tuir oráriu, Prezidente Repúblika José Ramos-Horta sei fila hikas mai Timor-Leste iha loron Sesta ka Sábadu hodi kontinua nia atividade hanesan bai-bain, maibé depende ba diagnóstika hosi médiku sira bainhira hala’o medical Check-Up iha Darwin-Austrália remata.

Antes ne’e Hatutan.com asesu informasaun hosi Prezidénsi Repúblika katak, ajenda lubuk ida Prezidente Repúblika nian iha loron rua tutuir malu  kanseladu tanba Prezidente Repúblika nia kondisaun saúde ladún estaáel no presiza deskansa.

Jornalista: Vito Salvadór