Hatutan.com, (15 Maiu 2023), Díli—Polísia Nasionál Timor-Leste (PNTL), liuhosi Komandu Munisípiu Dili, submeter ona prosesu kazu omesídiu bá Bernadino Ximenes Brites (tinan 20), iha área Lurumata, Aldeia 03, Suku Fatuhada, Postu Administrativu Dom Aleixo, Munisipiu Dili, bá Ministériu Públiku (MP).

Polísia mós detein ona suspeitu na’in-11 kompostu hosi inisiál LA, CJA, TA, FA, ARA, AA, GSS, HG, MSC, JS no DM, iha sela detensaun Caicoli, tanba deskonfia involve iha kazu ne’e iha Sábadu (13/05/2023),kalan Otl.

Lee Mós: Kazu Oho Bernadino Ximenes Brites Iha Lurumata, PNTL Assegura Joven Na’in-Hitu

“PNTL halo nia kna’ar, hodi identifika ema na’in-11 mak oras ne’e dadaun detein hela iha sela munisipiu Dili. Oras-ida ita hodi bá Ministériu Públiku hodi bele enkamiña bá iha Tribunál bá halo primeiru interrogatóriu,” Portavós komandu jerál PNTL, Superintendente Xefe Polísia, Arnaldo de Araújo informa iha sala konferénsia Kuartél Jerál Caicoli, Segunda (15/05/2023).

Hatán kona-bá motivu hosi kazu insidente omesídiu ne’e, Portavós Arnaldo dehan, polísia seidauk hatene loloos, tanba kazu ida ne’e sei iha prosesu identifikasaun nia laran. Uainhira to’o ona iha Tribunál mak ema foin bele hatene ninia kauza, karik tanba problema privádu, ka tanba grupu arte marsiál no grupu arte rituál.

Detein mós Jornalista Ida

Hosi suspeitu sira na’in-11 ne’e, iha suspeitu ida ho inisiál HG mak ho profisaun jornalista no hala’o kna’ar iha média nasionál ida.

Tanba ne’e, portavós Arnaldo dehan, PNTL hala’o ninia servisu bazeia de’it bá Lei, nune’e sidadaun Timor Oan sé de’it mak involve iha kazu ruma liu-liu iha kazu Luru-Mata, polísia sei prossesa hotu.

“Bá sira na’in-11, polísia identifika hotu no hetan informasoens hotu kona-bá sé sé mak involve iha ne’ebá. Ida-ne’e polísia foin halo identifikasaun, sei lori bá Ministériu Públiku atu hatete katak, ita hothotu, sé de’it, ita hotu iha Lei nia okos, to’o iha Tribunál bá mak foin bele deside sala ka la sala,”komandante Arnaldo esplika.

Ohin mós, Ministériu Públiku (MP) hasai ona despaixu PNTL hodi halo prosesu autópsia bá vítima ne’ebé mate no oras ne’e sei iha sala mortuáriu Hospitál Nacional Guido Valadáres (HNGV), Bidau-Dili.

Jornalista: Rogério Pereira Cárceres