Hatutan.com, (23 Abríl 2023), Díli-Partidu Repúblikanu (PR), liu hosi Vise II Sekretáriu Jerál, Teresinha da Silva Pires, kompromete katak, bainhira povu fó fiar bá Partidu Repúblikanu iha Eleisaun Parlamentár, tinan ne’e, sei loke servisu barak bá joven timoroan sira ho rihun 60 kada tinan.

Vise II Sekretáriu Jerál Partidu Repúblikanu, Teresinha da Silva Pires. Foto/Espesiál

“Ita Partidu Repúblikanu sei loke servisu barak bá Timoroan sira ne’ebé laiha servisu ho rendimentu ne’ebé kompete ho rekizitu  internasionál nian,” Hatutan.com sita komunikadu Partidu Republikanu nian iha sira-nia konta Facebook Partidu Repúblikanu Ofisiál, Domingu (23/04/2023).

Vise II Sekretáriu Jerál hato’o kompromisu polítika ne’e hodi hatán bá misaun partidu Republikanu nian ne’ebé hateten katak “LUTA BA MORIS DI’AK, UNIDADE HO DEMOKRASIA”.

Lema Partidu Repúblikanu iha kampaña eleisaun parlamentár 2023 nian mak “Book Aan.” Katak atu atinje servisu ida, hotu-hotu tenke book aan.

Prezidente Partidu Repúblikanu, João Mariano Saldanha iha biban konferénsia nasionál Partidu Repúblikanu, foin lalais ne’e, klarifika katak Partidu Repúblikanu nia lema kampaña eleisaun parlamentár nian mak “book aan”, katak se la book an, servisu hotu-hotu sei la la’o ho di’ak.

“Ita tenke book aan. Se ita la book aan, ita hamriik metin iha fatin. Ita book aan para la’o ba sorin-sorin, bá kotuk no bá oin. Ne’ebéatividade ida boot aan ne’e sentrál tebes bá Partidu Repúblikanu, tanba nia mak determina bá moris di’ak,” João Mariano Saldanha hateten.

Jornalista: Rogério Pereira Cárceres