Hatutan.com, (21 Abríl 2023), Díli— Selebrasaun loron Idul Fitri hanesan vitória bá komunidade Muslumana iha mundu tomak no mós iha Timor Leste (TL).

Sarani Muslumana Timor Leste, selebra loron Idul Fitri iha Masjid An-Nur, Kampu Alor, Díli, Sesta (21/04/2023). Foto/Elio dos Santos da Costa.

“Selebrasaun ida-ne’e, hanesan loron vitória ida. Apela ba komunidade Muslumana hodi fiar metin ba fee no karidade, fiar ba Maromak no Profeta sira hodi kontinua aplika iha moris tuir Maromak Nia hakarak. Idul Fitri tinan ne’e fó esperansa ba ema hotu hodi fó domin ba malu ho fuan moos no laran moos,” Vise Prezidente Konsellu Nasionál Islámika Timor Leste, Abdullah Inácio António Soares, hateten hafoin selebra loron Idul Fitri iha Masjid An-Nur, Kampu Alor, Díli, Timor-Leste, Sesta (21/04/2023).

Lee Mós:Iha Loron Idul Fitri, Marí Alkatiri Apoia Matérial Konstrusaun bá Sentru Juventude Katólika Daisoli

Abdullah Inácio António Soares konsidera selebrasaun ba Idul Fitri dala 1444 H ne’e hanesan vitória tanba loron konsege finaliza loron jejun durante fulan ida nia laran iha moris tomak.

Nia dehan, selebrasaun tinan ida ne’e diferente tebes ho tinan uluk nian bainhira enfrenta pandemia Covid-19, no ho grasa Maromak nian bele finaliza ho di’ak no ho haksolok.

Agradese bá kontribuisaun hosi líder nasionál sira, liu liu kontribui animál no ai-han, espesifikamente kria ekipa atu organiza selebrasaun Idul Fitri.

Iha fatin hanesan, Diretór Fundasaun An-Nur, Anwar da Costa dehan, loron boot Idul Fitri ne’e komunidade Muslumana iha mundu tomak inklui Timor-Leste selebra ho ksolok tanba konsege remata jejun durante fulan ida tomak ne’ebé hanorin atu fó perdaun ba ema no husu perdaun ba Maromak.

Aktividade rua importante durante jejun mak hanesan, atividade espirituál nian reza lorloron, jejun mak lee Alkuraun no ohin taka ho reza jerál solat Idul Fitri.

Asuntu sosiál maka fahe ai-han ba maluk sira ne’ebé kbi’it laek no ladún iha posibilidade atu selebra hamutuk iha biban ida-ne’e.

Nia iha esperansa katak, liu hosi reza hamutuk ohin nian Nai Maromak hasuli no tulun nafatin ema hotu  atu kria unidade no serbisu hamutuk iha nasaun ne’e, hodi la’o ba oin nafatin, liu-liu iha ámbitu eleisaun Parlamentár tinan ne’e.

Jornalista: Elio dos Santos da Costa