Hatutan.com, (11 Abríl 2023), Díli— Iha tinan 2023, Ministériu Edukasaun Juventude no Desportu (MEJD) fó ona kompeténsia tomak bá Ministériu Administrasaun Estatál (MAE) liu hosi Autoridade Munisípiu sira hodi halo rasik jestaun bá programa merenda eskolár iha eskola sira.

Ministru Edukasaun Juventude no Desportu, Armindo Maia.

Hafoin desizaun ne’e mosu, MEJD la hatama ona ninia “kanuru tohar” ka halo intervensaun ba jestaun programa ne’e rasik maibé halo de’it monitorizasaun ba ninia ezekusaun.

Lee Mós: Xefe Estadu Promulga OJE 2023 Billiaun $2,16

Kona-bá ne’e, Ministru Armindo Maia informa ona bá Primeiru Ministru (PM), Taur Matan Ruak, iha Palásiu Governu Díli, Tersa (11/04/2023).  

“Programa merenda eskolár ne’e desentraliza ona bá munisípiu sira. Orsamentu mós transfere ona bá munisipiu sira. MEJD ninia servisu maka politika, kona-bá menu, manuál no seluk tán. Maibé, implementasaun ne’e iha serbisu edukasaun munisípiu. Ami koordena nafatin, maibé ami labale kahur fali kanuru tohar,” Armindo Maia, esplika.

Parte MEJD mós rekoñese katak, implementasaun iha tinan ida ne’e tarde tanba iha mudansa ba mekanizmu, hanesan antes ne’e MEJD mak implementa direta maibé tinan ne’e parte MAE mak jere liu hosi Autoridade munisipál sira.

Tanba ne’e, oras-ne’e daudaun, MEJD halo hela koordenasaun ho MAE hodi aselera implementasaun bá programa ne’e iha eskola ida-idak iha territóriu nasionál.

Parte autoridade munisipál sira mós kria ona ekipa jestaun bazeia ba matadalan programa ne’e rasik no sei implementa tuir prossesu aprovizionamentu ne’ebé iha.

Iha tinan kotuk, orsamentu merenda eskolár transfere direta ba iha edukasaun munisípiu sira, maibé iha tinan ida-ne’e MEJD transfere liu husi autoridade munisípiu mak sei responsabiliza, hafoin aloka ba iha eskola ida-idak nia konta bankária.

Antes ne’e Vise-Ministru Administrasaun Estatál, Lino de Jesus Torezão informa katak, MAE halo ona transferénsia orsamentu merenda eskolár ba iha autoridade munisípiu sira, tanba sira mak iha kompeténsia atu halo jestaun bá programa ida-ne’e.

Iha manuál programa merenda eskolár nian hateten katak, kada estudante iha direitu hetan 0,42 sentavus, tanba ne’e parte MAE prevee millaun $15 bá benefisiáriu sira iha territóriu nasionál hosi eskola Ensinu Pré-eskolár to’o Ensinu Báziku Sentrál.

Jornalista: Rogério Pereira Cárceres