Hatutan.com, (05 Abríl 2023), Díli—Komandante Jerál Polísia Nasionál Timor-Leste (PNTL), Komissáriu Jerál Polísia Henrique da Costa lakohi fó komentáriu kona-bá prosesu investigasaun bá kazu sidadaun José Bernardo de Jesus Soares ne’ebé mate iha sela PNTL Caicoli tanba konsidera kazu ne’e kabe ba servisu órgaun judisiál nian.

Inan hosi José Bernardo ne’ebé mate iha sela Komandu PNTL Caicoli, hakat ba edifisiu PCIC hodi husu rezultadu prosesu investigasaun, Segunda (16/01/2023). Foto/Elio dos Santos da Costa.

“Ha’u lakohi komenta buat ne’ebé mak servisu ema seluk nian. Tanba ida-ne’e servisu parte instituisaun seluk ida nian ha’u lakohi fó komentáriu,” Komissáriu Polísia Henrique da Costa hateten hafoin enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato Bairru-Pité, Kuarta (05/04/2023).

Lee Mós: Kazu Mate Iha Sela Caicoli, Família Ejize Atu Assesu Bá Rezultadu Autópsia

Durante enkontru ho Xefe Estadu, Henrique da Costa  mós la ko’alia kona-bá kazu ne’e tanba ida-ne’e la’ós kazu ida ne’ebé PNTL mak hala’o nia prosesu no ida-ne’e instituisaun seluk mak hala’o prosesu.

Sidadaun ho naran José Bernardo de Jesus Soares, tinan 21, hela iha Audian, Kampu Futeból nia sorin ne’ebé mak lakon vida iha Sela Detensaun Komandu Polísia Munisípiu Díli.

Sidadaun ne’e tama bá detensaun iha 01 Setembru 2022, tanba sai suspeitu bá kazu baku-malu ne’ebé rezulta vítima hetan ofensa integridade grave no baixa iha sela ICU Hospitál Nasionál Guido Valadares (HNGV).

Suspeitu ka vítima mate iha sela detensaun iha tuku 19:0 kalan Otl, ho tali tara iha karokok.

Hafoin mate, polísia munisípiu Díli kontaktu kedan bá família hodi bá haree no akompaña, lori bá mortuáriu HNGV hodi hein desizaun bá autópsia.

Iha momentu kalan ne’ebá, autoridade sira hosi Ministériu Públiku Distritu Díli, PNTL Munisípiu Díli, Komandante PNSIK, PDHJ, Advogadu halo sorumutu hodi define investigasaun tuir ida-idak nia mandatu.

Foin lalais ne’e mós parte família kontinua ezije bá parte justisa atu família bele assesu ba rezultadu autopsia.

Jornalista: Vito Salvadór