Hatutan.com, (15 Fevereiru 2023), Díli—Comissão Anti Corrupção (CAC), iha Kuarta 15 Fevereiru 2023 notifika eis Ministru Obras Públikas (MOP) hodi presta deklarasaun hanesan sasin bá investigadór sira kona-bá kazu balun ne’ebé akontese iha nia mandatu.

Comissão Anti Corrupção (CAC), notifika eis Ministru Obras Públikas (MOP) Gastão Sousa, hodi presta deklarasaun hanesan sasin bá investigadór sira kona-bá kazu balun ne’ebé akontese iha nia mandatu, Kuarta (15/02/2023).

Informasaun ne’ebé Hatutan.com asesu katak, CAC notifika eis ministru Gastão Sousa nu’udár sasin bá kazu ho NUK 0017/20 PGGCC, relasiona kazu balun ne’ebé akontese iha ninia mandatu nu’udár ministru iha Governu anteriór.

Lee Mós: CAC Investiga Ministru Pedro dos Reis Nu’udár Suspeitu ba Krime Korrupsaun Passiva

Eis ministru Gastão Sousa to’o duni iha edifísiu CAC iha Kuarta dadeer tuku 09:00, hodi fó ninia deklarasaun ne’ebé konsidera nesesáriu.

“Ha’u laiha kazu ida. Mai hasoru ha’u nia kolega sira iha-ne’e. Ha’u ko’alia di’ak, signifika laiha buat ida,” Gastão Sousa hateten hafoin deklara bá investigadór sira iha CAC-Faról, Kuarta (15/02/2023).

Hatán kona-bá kazu saida mak CAC notifika eis Ministru Obras Públikas ne’e bá presta deklarasaun, Komisáriu CAC, Sérgio Hornai dehan, nia seidauk iha koñesimentu tanba seidauk iha relatóriu ruma hosi investigadór sira, nune’e labele fó informasaun.

Maski nune’e, Komisáriu Sérgio Hornai dehan, sidadaun hotu-hotu bele bá presta deklarasaun iha CAC. Ida-ne’e, devér kolaborasaun individu ka institusionál, sidadaun hotu-hotu ninian atu koolabora ho instituisaun órgaun polisiál kriminál, tanba razaun kompeténsia ka atribuisoins de kompeténsia ne’ebé fó bá CAC.

“Entaun, ne’e devér ida sidadaun hotu nian, atu bele kontribui ho órgaun polisia krininal sira, ho titular investigadór sira ne’ebé simu ona prosesu atu halo investigasaun kriminalidade bá iha ne’ebá,” Sérgio Hornai hateten.

Komisáriu CAC ne’e esplika, sidadaun sé de’it mak iha, bainhira tama prosesu, sira bele testamuña, bele péritu, bele arguidu, ka ne’ebé mak CAC suspeita, bele bolu hodi bele halo averiguasaun, halo dilijénsia nune’e pura loloos, verdade.

“Dala-ida tán, atu pura loloos verdade bá alegasoins sira ne’ebé ita suspeita, mosu daudaun atu bele haree ho objetividade, ho loloos, ho tebtebes duni bá faktu sira ne’ebé alega ne’e loos, prova sira ne’ebé mak alega ne’e loos, elementus de krime ne’ebé karik ita atu konstitui, loos. Iha-ne’e mak ita bele hatene, hodi halo relatóriu nu’udár hanesan inkéritu finál hodi submete bá iha autoridade kompetente,” Sérgio Hornai esplika.

Sérgio Hornai dehan, iha buat rua mak nia hakarak hateten, CAC nia funsaun maka, ida tenke asegura no halo kontrolu bá legalidade sira no labele tau kauza bá ema ninia direitu fundamentál, iha preseitu rua.

“Objetividade, legalidade, imparsiálidade, no independénsia iha ninia serbisu sira, atu garante no asegura liu-liu iha investigasaun kriminalidade ninian, bá iha direitu fundamentál sidadaun hotu nian,” Sérgio Hornai subliña.

Jornalista: Rogério Pereira Cárceres