Hatutan.com, (13 Fevereiru 2023), Díli—Prezidente Repúblika, José Ramos-Horta dekreta ona data eleisaun Parlamentár, iha 21 fulan Maiu tinan ne’e.

Data ne’e Xefe Estadu dekreta ofisialmente liu hosi Dekretu Prezidente Repúblika númeru 9/2023, 13 de Fevereiru kona-bá Markasaun data ba Eleisaun Parlamentares.

Iha Dekretu ne’e hateten, konsidera nesesáriu tebes atu marka data eleisaun ba deputadu sira Parlamentu Nasionál nian, rona uluk governu no Partidu Politiku sira ne’ebé hetan asentu iha Parlamentu Nasionál, tuir baze ne’ebé konsagra iha iha alinea c) artigu 86 Konstituisaun Republika Demokratika Timor Leste (K-RDTL).

Alende ne’e, K-RDTL númeru 1 artigu 17 hosi Lei Eleitoral ba Parlamentu Nasionál nian ne’ebé aprovada liu hosi Lei númeru 6/2006, 28n dezembru, publika hikas hosi Lei númeru 5/2007, 28 marsu, Lei númeru 7/2011, 22 juñu, Lei númeru 1/2012, 13 janeiru, no Lei númeru 9/2017, 7 maiu.

Dekretu ne’e tama vigór iha data ne’ebé Prezidente Republika halo asinatura no publika iha Jornál Repúblika iha 13 Fevereiru 2023.

Jornalista: Vito Salvadór