Hatutan.com, (05 Fevereiru 2023), Díli—Prezidente partidu Frente Revolusionária de Timor-Leste Independente (FRETILIN), Francisco Guterres “Lú Olo”, afirma FRETILIN tenke hateke bá oin ho objetividade. Independentemente hosi maioria ne’ebé mak FRETILIN hetan iha eleisaun, FRETILIN sempre tenke parseria.

Lee Mós : Lideransa Troika iha FRETILIN, Lere Sente Sai De’it Boneka

Francisco Guterres “Lú Olo” afirma lia hirak-ne’e iha nia intervensaun abertura Konferénsia Nasionál Da-limak Partidu FRETILIN nian, Sábadu (04/02/2023),  iha Salaun Katedrál Díli.

Prezidente Partidu FRETILIN, Francisco Guterres “Lú Olo”. Foto/Elio dos Santos da Costa

Komunikadu imprensa ne’ebé Hatutan.com asesa relata katak konferénsia nasionál partidu FRETILIN nian ne’e hodi prepara bá hasoru eleisaun parlamentar tinan-2023 no iha konferénsia ne’e halibur konferensista hamutuk na’in-500 resin, hosi munisípiu 13 no RAEOA, Postu, Organizasaun Massa no Organizasaun filiadas FRETILIN nian, no mós ho kuatru tékniku no polítiku sira nu’udar observador.

Sesaun abertura, ne’ebé hala’o iha parte dadeer, hetan partisipasaun hosi representante hosi Partidu Polítiku sira, hanesan Partidu Libertasaun Povu (PLP), KHUNTO, Partidu Demokrátiku (PD), PUDD ho Os Verdes.

“FRETILIN hasoru no hakat liu ona dezafiu barabarak iha tinan barak nia laran. Maibé dezafiu hirak ne’e pozitivu tamba sira permite atu ita koko ita-nia kapasidade rasik. FRETILIN nia vitoria tenke sai Povu nia vitoria,” Lú Olo hatutan.

Ko-prezidente Troika Lideransa FRETILIN nian, Lere Anan Timur hateten bá konferensista sira katak, “Troika lideransa FRETILIN nian nu’udár ponte ida atu konsolida FRETILIN bá manan iha eleisaun parlamentar tinan-2023 tamba eleisaun ida ne’e determinante.

“Ha’u fiar FRETILIN sei manan no ukun iha tinan-2023, maske luta ne’e sei la fasil. FRETILIN tenke assumi ninia responsabilidade tamba tinan-lima (5) mai ne’e determinante ba Timor-Leste nia vida nu’udár Estadu no Nasaun,” Lere Anan Timur hatutan.

Sekretáriu Jerál FRETILIN, Mari Alkatiri hateten iha nia intervensaun katak “eleisaun parlamentar tinan-2023 luta ida ne’ebé sei forte, maibé ita sei manan.”

Sekretáriu Jerál FRETILIN, Mari Alkatiri. Foto/Elio dos Santos da Costa

“FRETILIN tenke manan atu hametin Estadu no halo Nasaun moris ho di’ak, tamba bainhira Estadu metin mak Nasaun bele moris. Tamba ne’e, labele iha ema ida moris iha Estadu nia leten, no labele mós iha ema ida ne’ebé moris iha Nasaun nia leten,” Mari Alkatiri esplika.

“Eleisaun tinan ida ne’e sei taka kamiñada naruk ida. Maibé, eleisaun ne’e mós sei hahú kamiñada foun ida.  Povu manan, FRETILIN manan,” Sekretáriu Jerál FRETILIN hateten.

Haktuir ba mandatu husi diskute no aprova Estatutu partidu nian. Estatutu ne’ebé konferénsia aprova harii Troika Lideransa FRETILIN nian ne’ebé sai nu’udár Órgaun Orientador ho kompeténsia atu orienta FRETILIN ne’ebé mai husi lejitimidade istórika lider FRETILIN nian nu’udár fundador ne’ebé sei kontinua iha FRETILIN, Mari Alkatiri, Sekretáriu Komisaun Diretiva FRETILIN (CDF) da-ikus, militante FRETILIN hosi tinan-1974,  Francisco Guterres Lú-Olo, no Membru CCF segunda jerasaun sobrevivente úniku (Partidu MLF) no militante FRETILIN hahú husi tinan-1974, Lere Anan Timur.

Konferénsia mós aprova rezolusaun balu ne’ebé loke dalan bá FRETILIN atu hala’o serbisu preparativus sira bá eleisaun parlamenta tinan-2023.

Tuir lolós, Konferénsia Nasionál ne’e hala’o to’o loron-5 fulan-Fevereiru, maibé tamba loron ne’e loron Domingu, Sekretáriu Jerál FRETILIN husu atu konferensista sira konklui kedas konferénsia iha loron ida, nune’e permite konferensista sira, ne’ebé maioria sarani Katólika, atu bele ba tuir misa loron Domingu nian.

Jornalista : Vito Salvadór