Hatutan.com, (25 Janeiru 2023), Díli- Prizaun loron bá eleisaun Parlamentár nian bele monu ka bele halo iha loron 6 ka loron 12 fulan-Maiu 2023.

Lee Mós : Governu Prontu Organiza Eleisaun Parlamentár 2023

PR Ramos-Horta halo enkontru ho partidu koligasaun FDD kompostu hosi UDT, PUDD ho FM. Foto/Elio dos Santos da Costa

Previzaun loron eleisaun nian ne’e nu’udár ideia ne’ebé Prezidente Repúblika (PR), José Ramos-Horta, hato’o bá Partidu koligasaun Frente Dezenvolvimentu Demokrátiku (FDD)  liuhosi ámbitu konsultasaun ho partidu polítiku sira molok PR Ramos-Horta dekreta loron eleisaun parlamentár 2023.

Koligasaun FDD ne’ebé hetan asentu iha Parlamentar ne’e mak hanesan Partidu União Democrática Timorense (UDT), Partidu Unidade Dezenvolvimentu Demokrátiku (PUDD) ho partidu FRENTI-MUDANÇA (FM).

Prezidente partidu UDT, Francisco David hateten, UDT mai ho partidu rua seluk; PUDD ho FM ne’ebé uluk iha koligasaun FDD mai  responde bá konvite ne’ebé mai hosi Prezidente Repúblika hodi haree bá loron eleisaun parlamentár 2023.

Prezidente Repúblika adianta bá UDT, PUDD ho FM katak iha previzaun ba eleisaun parlamentár sei monu iha loron 6 ka loron 12 fulan-Maiu 2023. Tanba ne’e haree tuir Konstitusaun iha artigu 86 aline c hatete katak kompeténsia tomak Xefe Estadu nian, hodi dekreta data bá eleisaun parlamentár, ho ida ne’e, UDT prontu no sei submete de’it bá desizaun Xefe Estadu.

“Kona-bá loron  eleisaun parlamentár 2023, Xefe Estadu previstu bá loron 6 ka bele mos loron 12 fulan-Maiu 2023, maibé data loloos bá eleisaun parlamentár Xefe Estadu sei anunsia hafoin konsultasaun ho partidu polítiku sira hodi konfirma loloos,” Francisco David bá jornalista sira hafoin hasoru malu ho Prezidente Repúblika José Ramos-Horta iha Palásiu Prezidensiál, Kuarta (25/01/2023).

Xefe Bancada UDT ne’e akresenta katak  UDT laiha tan pozisaun ruma relasióna ona ho kompeténsia Xefe Estadu nian hodi dekreta loron bá eleisaun, tanba ne’e UDT sei halo tuir de’it desizaun Xefe Estadu nian tanba Xefe Estadu nia desizaun hanesan mós UDT nia desizaun.

UDT nia preparasaun bá eleisaun parlamentár 2023 másimu hahú husi baze no UDT laiha hanoin atu halo koligasaun pre-eleitorál.

Iha fatin hanesan Prezidente partidu FM, Ricardo Cardoso Nheu hateten kona-bá markasaun loron bá eleisaun ne’e kompeténsia tomak Xefe Estadu nian no FM prontu atu partisipa no saida mak Xefe Estadu  foti FM sei submete.

“Frente Mudansa prontu iha kualkér tempu atu hasoru eleisaun parlamentár 2023 tuir data ne’ebé Xefe Estadu sei dekreta,” Ricardo Cardoso Nheu hateten.

Prezidente PUDD, Silvestre Sufa hateten, PUDD konsidera no tane as katak  dekreta loron eleisaun parlamentár ne’e direitu preogrativu Xefe Estadu nian no PUDD hanesan partidu polítika prepara de’it nia an atu bainhira de’it mak Xefe Estadu dekreta loron eleisaun.

“PUDD hein de’it bainhira mak eleisaun tuir loron ne’ebé Xefe Estadu dekreta,” Silvestre Sufa hateten.

PUDD nia preparasaun klaru ona hahú kedas iha 2021 tanba partidu polítiku nia servisu iha buat rua; ida mak servisu diáriu no seluk mak servisu polítiku tanba ne’e prontu ona atu infrenta eleisaun iha kualkér momentu bainhira Xefe Estadu dekreta loron eleisaun.

Kona-bá koligasaun pre-eleitorál PUDD seidauk hanoin tanba koligasaun ne’e depende bá konsensu partidu polítiku sira nian, maibé PUDD garante sei hakat liu bareira.

Jornalista: Vito Salvadór