Hatutan.com, (24 Janeiru 2023), Díli—Primeiru-Ministru Taur Matan Ruak deklara, Governu prontu no garante organiza eleisaun parlamentár 2023 bainhira Xefe Estadu dekreta loron eleisaun iha tempu badak.

Primeiru-Ministru Taur Matan Ruak hala’o reuniaun semanál ho Prezidente Repúblika, José Ramos-Horta iha Palásiu Prezidensiál Nicolau Lobato, Bairru Pité, Tersa (24/01/2023).

Primeiru-Ministru Taur Matan Ruak mós deklara ona prontidaun ne’e durante enkontru semanál ho Prezidente Repúblika, José Ramos-Horta iha Palásiu Prezidensiál Nicolau Lobato, Bairru Pité, Tersa (24/01/2023).

Lee Mós: 13 Fevereiru, Prezidente Repúblika Dekreta Loron Eleisaun Parlamentár

“Hanesan ema hotu hatene, marka loron ba eleisaun parlamentár ne’e perogativa ida hosi Xefe Estadu, depois rona governu, partidu polítiku iha asentu parlamentár no seluk-seluk. Hosi parte governu, ha’u garante ba Xefe Estadu katak desizaun saida mak Xefe Estadu foti, governu prontu atu organiza, garante katak eleisaun sira ne’ebé mai sei la’o di’ak, hanesan eleisaun bai-bain ita halo,” Primeiru-Ministru Taur Matan Ruak hateten hafoin enkontru ho Xefe Estadu.

Taur Matan Ruak hatutan, eleisaun Parlamentár hanesan momentu importante loos iha rai ne’e, presiza festa demokrásia, entaun bainhira festa, tenke organiza didi’ak atu festa labele aat, la’o di’ak to’o fim ne’e mak garantia ne’ebé fó ba Xefe Estadu.

“Ita hein data saida mak Prezidente Repúblika hili, ita haree to’o agora ha’u labele espekula, ha’u nia garantia ba Xefe Estadu katak governu sei halo buat hotu-hotu atu eleisaun ne’e bele la’o,” afirma.

Antes ne’e, Informasaun ne’ebé Hatutan.com asesu hosi fontes oioin iha Palásiu Prezidensiál katak  posivel boot liu iha loron 13 fulan-Fevereiru 2023, Prezidente Repúblika (PR) dekreta loron eleisaun Parlamentár nian.

Maske nune’e, molok too  iha ne’ebá, Prezidente Repúblika sei konvoka sorumutuk ho ho líder partidu politíku (Parpol)  sira ne’ebé asentu iha Parlamentu Nasionál hodi koalia kona-bá markasaun bá data ka loron bá eleisaun parlamentár nian ne’e.

Jornalista: Vito Salvadór