Hatutan.com, (16 Janeiru 2023), Díli—Ekipa konjunta kompostu hosi Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) kaptura ona suspeitu ho inisiál AP ne’ebé envolve iha kazu omisídiu iha área Delta-Elemloi.

Lee Mós : Kazu Omisídiu iha Delta-Elemloi, Komisaun B Husu Buka Tuir Lalais Autór

Motór ida ne’ebé akipa konjunta PNTL ho F-FDTL sira asegura bainhira kaptura suspeitu ho inisiál AP iha Darlau, Postu Administrativu Atsabe, Munisípiu Ermera, Segunda (16/01/2023). Foto/Elio dos Santos da Costa

Kazu omisídiu ne’ebé hakotu vítima Isaac Hornai Baptista nia vida ne’e akontese iha Sesta madrugada, 06 fulan-Janeiru 2023, hale’u tuku 02:00 Otl.

Informasaun ne’ebé Hatutan.com asesu hosi fonte ekipa sekreta sira katak  suspeitu ho inisiál AP ne’e, parte PNTL ho F-FDTL kaptura iha área Darlau-hun, Postu Administrativu Atsabe, Munisípiu Ermera.

Molok kaptura suspeitu AP, iha Domingu (15/01/2023),  ekipa konjunta PNTL ho F-FDTL lokaliza  besik suspeitu nia subar fatin halo serku no buka tuir. Nune’e, Segunda (16/01/2023), ekipa sira kaptura kedas suspeitu.

Iha lokál kapturasaun, ekipa konjunta mós foti ho motór ida ne’ebé deskonfia suspeitu sira utiliza hodi bá “oho” matebian  Isaac Hornai Baptista. Ekipa konjunta mós lori ho suspeitu nia alin ne’ebé hamutuk hela ho suspeitu.

Daudaun ne’e, suspeitu ho inisiál AP iha ona Polísia Nasionál Servisu Investigasaun Kriminál (PNSIK) iha Kuartél Jerál PNTL, Díli, hodi submete bá identifikasaun no investigasaun kriminál.

Lee Mós : Gravasaun CCTV Hatudu Ema Na’in-rua Mak Oho Isac Hornai iha Delta-Elemloi

Jornalista : Rogério Pereira Cárceres