Hatutan.com, (13 Janeiru 2023), Díli—Líder nasionál, Kay Rala Xanana Gusmão tun direta ba terrenu hodi obserba uma komunidade no semitériu jerál ne’ebé mota sobu iha aldeia Nunuhenu, Suku Cunha, Sub Rejiaun Pantai Makasar, Rejiaun Administrativu Espesiál Oe-Cusse Ambeno (RAEOA).

Komunidade simu líder istóriku, Kay Rala Xanana Gusmão ne’ebé haree direta uma komunidade no semitériu jerál ne’ebé mota sobu iha aldeia Nunuhenu, Suku Cunha, Sub Rejiaun Pantai Makasar, Rejiaun Administrativa Espesiál Oe-cusse Ambeno (RAEOA). Foto/Espesiál.

Udan boot ne’ebé akontese iha loron 24 Dezembru 2022 kalan, mota Tono sobu uma komunidade 10 ho Uma Lisan Nunuhenu inklui rate lubuk ida iha semitériu públiku.

Lee Mós: Estragus iha 04 Abríl 2021, MOP Rekoñese Tarde Iha Intervensaun

Komunidade aldeia Nunuhenu, Olinda Maria Ribeiro da Cruz konta, udan loron tomak iha 24 Dezembru 2022 lori tristeza ba povu bainhira halo hela preparasaun atu ba misa Natál.

Depois de akontesimentu, komunidade konsege hetan apoiu umanitária hanesan fo’os, mina no ai-han seluk tán hosi ekipa Kay Rala Xanana Gusmão ho Kruz Vermelha Timor-Leste (CVTL).

“Ami foin simu apoiu hosi maun boot Xanana ho Kruz Vermelha, maibé autoridade RAEOA to’o agora seidauk fó apoiu ruma no seidauk koloka ekipamentu ruma atu mai normaliza mota,” Hatutan.com sita deklarasaun Olinda Maria Ribeiro da Cruz iha komunikadu.

Iha fatin hanesan, Xefe Suku Cunha, Domingos Seco Caunan hateten inunadasaun ne’e ba dala rua ona, ba dala uluk iha 04 Abril 2021 no agora akontese tán, maibé autoridade RAEOA seidauk fó apoiu ruma ba vítima sira iha aldeia ne’e.

Rate ne’ebé hetan estragus hosi mota iha aldeia Nunuhenu, Suku Cunha, Sub Rejiaun Pantai Makasar, Rejiaun Administrativa Espesiál Oe-cusse Ambeno (RAEOA). Foto/Espesiál

“Mota sobu dala rua ona, maibé to’o agora autoridade RAEOA mai promote atu hadi’a no harii fali uma komunidade, inklui atu lori apoiu maibé to’o agora la mosu,” Autoridade lokál ne’e informa.

Kona-bá situasaun ne’e, líder istóriku Kay Rala Xanana Gusmão dehan, sei buka atu koordena ho emprezáriu Oecusse oan atu apoiu ekipamentu pezadu buka rezolve problema ne’ebé komunidade enfrenta, liu-liu normaliza hikas mota dalan atu satan bee-mota labele sobu uma komunidade.

“Ha’u sei ko’alia ho ita nia seitór privadu Oe-cusse oan atu normaliza hikas mota dalan,” Xanana promete.

Durante hala’o vizita, Xanana Gusmão hamutuk ho komunidade hala’o mós serimónia rituál tuir fiar atoni nian hodi labele sai vítima beibeik ba dezastre naturál.

Jornalista: Vito Salvadór