Hatutan.com, (04 Janeiru 2023), Díli-Projetu konstrusaun edifísiu “provizóriu” Rádiu Televizaun Timor-Leste, Empreza Públika (RTTL,E.P)  ne’ebé ezekuta hosi kompañia  BANIR LEMA UNIP.LDA, seidauk finaliza tuir nia tempu kontratu (atrazu).

Lee Mós : Projetu Edifísiu “Provizóriu” RTTL,E.P, CNA Rekomenda Kompañia BANIR LEMA

Kuadru Avizu Projetu Konstrusaun Edifisiu provizoriu RTTL,E.P. Foto/Elio dos Santos da Costa

Projetu ho montante orsamentu millaun $1-resin ne’e tuir kontratu ne’ebé estabelese entre Ministru  Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo  ho na’in bá kompañia BANIR LEMA UNIP.LDA,  Domingos Sequeira, katak tenke finaliza no entrega iha fulan-neen (6) nia laran, hahú hosi loron 29 fulan-Juñu 2022 no finaliza iha loron 29 fulan-Outubru 2022.

Iha ámbitu serimónia asina kontratu ho kompañia BANIR LEMA UNIP.LDA iha arredores edifísiu RTTL, E.P, Caicoli, Díli,  Tersa 28 fulan-Juñu 2022, Ministru MAPKOMS Francisco Martins da Costa Pereira Jerónimo, husu bá kompañia BANIR LEMA UNIP.LDA atu aselera prosesu konstrusaun bá edifísiu ne’e, tanba durasaun tempu konstrusaun  durante fulan-neen (6) de’it.

Iha fatin hanesan, diretór BANIR LEMA UNIP.LDA,  Domingos Sequeira, mós garante katak, sei konklui konstrusaun foun bá edifísiu provizóriu RTTL, E.P iha fulan-neen  (6) nia laran tuir kontratu.

“Ha’u gante katak, hotu, tanba material hotu, ami order mai hotu hosi Indonézia, prepara hotu ona. Antes tama asina kontratu mós, ami nia badaen, hothotu kompletu ona. aban bá oin, ami komesa harii ona armazén iha ne’e, hotu ami book ona. Ha’u garante fulan-neen (6) bele hotu,” Domingos Sequeira promete tempu ne’ebá. Infelizmente, to’o oras ne’e, projetu konstrusaun edifísiu provizóriu bá RTTL,E.P ne’e rasik, seidauk konklui tuir tempu kontratu ne’ebé estabelese ona.

Lee Mós : ADN Sei Halo Monitorizasaun Bá Garante Kualidade Projetu Konstrusaun Edifísiu “Provizóriu” RTTL,E.P

Bá jornalista sira, Kuarta (04/01/2023), Ministru MAPKOMS Francisco Jerónimo, fó razaun katak  projetu ne’e seidauk finaliza tuir tempu ne’ebé iha tanba kestaun udan no kontraktor ho nia tékniku sira presiza halo tán ajustamentu balu.

Projetu Edifisiu RTTL,E.P. Foto/Elio dos Santos da Costa

“Obra ne’e tuir loloos iha kontratu fulan-neen (6), ita-boot sira hatene. Maibé, kompañia ho tékniku sira haree buat sira ne’e tenke iha ajustamentu, entaun, tanba situasaun udan, buat sira ne’e hotu, depois ko’alia kona-bá téknikamente, buat ida ema dehan MPA ne’e, atu choor buat ida, tenke presiza loron 30,” Ministru Francisco Martins da Costa Pereira Jerónimo, hateten hafoin presta deklarasaun hanesan arguido bá kazu projetu instalasaun Set-top Box RTTL,E.P iha edifísiu CAC, Farol, Díli.

Ministru  Francisco Jerónimo husu bá kontraktor atu aprezenta fila-fali ‘preokupasaun’ sira ne’e bá nia, no tanba kontraktor rasik mós husu atu extende ka hanaruk tempu konstrusaun bá projetu ne’e bá fulan-neen (6) tán.

“Entaun buat sira ne’e hotu, tékniku sira atu aprezenta fali, tanba kontraktor husu mai atu extende tán fulan-neen (6). Maibé, ha’u seidauk foti desizaun, tanba ha’u husu bá tékniku sira atu aprezenta paresér tékniku kona-bá tanba saida maka husu atu extende. Entaun, sira tenke fó para nune’e bele iha baze ida para ita bele extende,” Ministru Francisco Jerónimo, hateten.

Lee Mós : Konstrusaun Edifísiu “Provizóriu” RTTL,E.P Sei Gasta Millaun $1-resin

Hatán kona-bá identidade kontraktor no perfíl kompañia ne’e hosi ne’ebé, MAPKOMS ho dehan,  “Kontraktor, señór Domingos Sequeira hosi Liquiça, dehan hosi Liquiça, ha’u mós laiha relasaun ho sira, tanba, ne’e Komisaun Nasionál Aprovizionamentu (CAN, sigla portugés) maka halo aprovizionamentu, sira maka deside, ami simu de’it,” MAPKOMS hateten tán.

Edifísiu “provizóriu” RTTL,E.P ne’e andár tolu;  medida naruk metru 30 no nia luan metru 15 ne’e ho orsamentu millaun $1-resin.

Lee Mós : Kazu Projetu Instalasaun Set-top Box RTTL,E.P, Ministru MAPKOMS Konstitui Bá Arguido

Jornalista: Rogério Pereira Cárceres