Hatutan.com, (28 Dezembru 2022), Díli—Polísia Nasionál Timor-Leste (PNTL), liuhosi Komandu Jerál iha Kuarta 28 Dezembru 2022, deside hodi nomeia Superintendente Xefe, Natércia Eufrásia Soares Martins, hodi lidera komandu Munisípiu Díli.

Polísia Nasionál Timor-Leste (PNTL), liuhosi Komandu Jerál iha Kuarta 28 Dezembru 2022, deside hodi nomeia Superintendente Xefe, Natércia Eufrásia Soares Martins, hodi lidera komandu Munisípiu Díli. Foto/PNTL.

Komandante Jerál PNTL, Komisáriu Polísia, Faustino da Costa hateten, serimónia nomeasaun ida-ne’e, nu’udár eventu kontinuasaun tanba iha inísiu fulan Dezembru, PNTL implementa no kumprimenta saida mak Lei Orgánika PNTL ninian iha hodi nomeia ona komandante balun bá iha pozisaun tuir estrutura orgánika ne’ebé iha.

Lee Mós: Komandu PNTL Muda Henrique da Costa Lidera Departamentu Pesoál-Formasaun

“Tanba ne’e mak ohin ita kontinua bá faze daruak ninian. Komandu munisípiu Díli ida-ne’e, ha’u promete hela ha’u dehan tempu badak, ha’u sei nomeia. Tanba ne’e mak ohin tau Superintendente Xefe Natércia Martins nu’udár komandante bá Komandu Autoridade Munisipál Díli,” Komisáriu Polísia Faustino da Costa hateten hafoin serimónia pose iha Kuartél Jerál PNTL, Caicoli, Kuarta (28/12/2022).

Komisáriu Polísia, Faustino da Costa dezafia komandante foun Munisipiu Dili nian tenke halo koordenasaun nomós kooperasaun ho entidade relevante sira, maibé mós tenke haree bá asuntu interna instituisaun nian liu-liu membru sira iha área ne’ebé komanda.

Komandante Jerál bá instituisaun PNTL ne’e husu membru sira atu labele ezíje de’it sira nia direitu, maibé hanesan membru ida instituisaun nian, tenke iha obrigasaun atu ezekuta órden serbisu hosi komandu no halo serbisu tuir Lei no Konstituisaun RDTL.

“Aproveita oportunidade ida ne’e, bá iha komandu autoridade munisipal Díli, Superintendente Xefe Natércia bá tán, hanesan komandante munisipiu, atu komanda autoridade ne’ebé kompleksu, munisipiu ida ne’ebé sentru konsentrasaun buat hotu. Ha’u dezafia ita boot, nune’e kontinua serbisu ho entidades no autoridades sira hotu tanba kapitál nasionál, fásil ita atu bele hamate problema hotu iha tempu ida ne’ebé badak tebes,” Komisáriu Polsia Faustino da Costa, hameno.

Iha biban ne’e, komandante foun iha Komandu Munisipiu Dili, Superintendente Xefe, Natércia Eufrásia Soares Martins dehan, mandatu ida-ne’e nia foin mak simu, tanba ne’e seidauk garante buat ruma bá públiku nomós seidauk iha entrega malu serbisu.

Komandante Natércia dehan, bainhira iha ona serimónia entrega malu serbisu nia ho estrutura tomak, sira sei ko’alia sei buka atu hatene situasaun iha kapitál Dili laran, depois mak hasai sira ninia planu ruma, estratejia saida mak atu halo.

“Feto dahuluk ne’e bá dala-tolu ona. Mais iha munisipiu Dili, ha’u feto dahuluk. Ha’u seidauk bele ko’alia buat ida bá imi, iha ne’e. Maibé ha’u hakarak atu hateten de’it iha ne’e mezmu komandante troka ida bá ida, mais kuandu ema hotu ne’ebé hela iha Dili laiha kooperasaun, laiha konsiénsia atu muda hahalok, ne’e krime kontinua la’o,” Natércia Eufrásia Soares Martins, hateten.

Bainhira autoridade sira ne’ebé mak iha kompeténsa la hala’o sira nia responsábilidade, Natercia dehan ida ne’e mós labele rezolve problema ne’ebé mosu iha sosieade, tanba krime mosu sempre iha nia kauza.

“Kona-bá krime, ne’e laiha dúvidas, tanba ita iha lei no prosedimentu, ita ninia polisiais liu-liu investigasaun sira hatene papél, depois komandu sei jere kada seksoins atu hala’o sira nia funsaun tuir prosedimentu ne’ebé mak estabelese ona iha ita nia lei,” Natércia Martins, hateten.

Jornalista: Rogério Pereira Cárceres