Hatutan.com, (20 Dezembru 2022), Díli—Plenária estraordinária halo ona apresiasaun ba pedidu rezignasaun totál Virgílio da Silva Guterres “Lamukan” hosi kargu Prezidente no Membru Conselho de Imprensa (CI) ba períudu 2021-2025, iha Tersa (20/12/2022).

Konferénsia Imprensa iha Salaun Conselho Imprensa (CI), Kintál boot, Tersa (20/12/2022).

Iha plenária estraordinária ne’e, liuhosi votasaun, membru sira hili ona Konsilleiru Francisco Belo Simões da Costa hanesan Prezidente Interinu CI ho mandatu durante loron 90 ka fulan tolu.

Lee Mós: Virgílio Guterres Submete Ona Pedidu Rezignasaun Hosi Kargu Prezidente no Membru CI

Plenária estraordinária ne’e prezide hosi membru Conselho Imprensa, Expedito Loro Dias Ximenes no partisipa hosi membru CI Francisco Belo Simões da Costa, Otelio Ote, Benevides Correia Barros no Diretór ezekutivu Rigoberto Monteiro.

Karta rezignasaun ne’ebé “Lamukan” submete iha plenária ordinária Conselho de Imprensa, Segunda (19/12/2022) ho konteúdu husu atu rezigna an tanba iha loron 12 fulan Dezembru 2022, Parlamentu Nasionál (PN) eleze ona nia nu’udár Provedór Direitus Humanus no Justisa (PDHJ) ba periúdu 2023 to’o 2027.

Tanba ne’e, hahú ohin Tersa (20/12/2022), Virgílio la’ós ona Prezidente no membru CI, nunee Prezidente Interinu CI sei komunika fali ho AJTL atu halo konferénsia hodi hili fali nia membru ida ka jornalista atu bele troka Virgílio Guterres hanesan membru CI periúdu 2021-2025.

Asosiasaun Jornalista Timor Leste (AJTL) hili Virgílio da Silva Guterres ba membru Conselho imprensa bá períudu 2016 to’o 2021, no eleitu hikas bá períudu 2021-2025.

Hafoin apresisaun bá rezignasaun no eleisaun liu hosi konferénsia imprensa Virgílio Guterres agradese ba konfiansa tomak hosi entidade hotu-hotu liuliu ba konsilleiru sira hotu, Diretór ezekutivu, diretór sira hotu iha CI, funsionáriu sira CI ninian, ba apoiu tomak ne’ebé nia hetan durante hala’o knaar nu’udár Prezidente durante mandatu dala-rua.

“Apresia ba apoiu tomak mai ha’u durante mandatu rua maski mandatu ikus ne’e seidauk remata. Apresia mós ba antidade hotu liuliu média no jornalista tomak nia apoiu ba mandatu iha CI,” Virgílio Guterres agradese.

Nune’e mós Prezidente Interinu CI, Francisco Belo Simões da Costa agradese ba Virgílio Guterres ne’ebé ho dedikasaun no sentidu voluntarizmu kontribui ona ba estabelesimentu Consellho Imprensa ho nia mandatu nu’udár Prezidente durante mandatu dala-rua.

Prezidente Interinu CI ne’e iha esperansa katak, vizaun ne’ebé virgílio iha sei buras iha CI no sei kontinua buras liu tán iha misaun foun iha Provedoria dos Direitus Humanos no Justisa (PDHJ).

Francisco Belo Simões da Costa hanesan Prezidente Interinu CI ho mandatu durante loron 90 ka fulan tolu, sei fasilita atu halo kooredenasaun ho AJTL hodi realiza kongresu ida, nune’e bele eleze hikas ninia reprezentasaun iha CI.

Jornalista: Elio dos Santos da Costa