Hatutan.com, (30 Novembru 2022), Díli—Timor Oan sira ne’ebé apoia selesaun Potugéza iha jogu Kopa mundiál tinan 2022, konsege kontribui tasa ba Estadu Timor Leste durante jogu kontra selesaun hosi nasaun Uruguay, tanba Polisia Nasionál Timor Leste (PNTL) liu hosi Seksaun Tránzitu Díli, prende motór 38 mak kontra sinais tránzitu durante konvoi iha sidade Díli.

Timor Oan sira ne’ebé apoia selesaun Potugéza iha jogu Kopa mundiál tinan 2022, hala’o konvoi iha Díli durante jogu kontra selesaun hosi nasaun Uruguay iha dia 29 novembru 2022 dader. Foto repro média sosiál.

Evidénsia hosi motorizada hirak-ne’e PNTL halo apreensaun, molok no hafoin asiste jogu Kopa Mundiál nian entre nasaun Portugál ho Uruguay, iha Qatar.

Rezultadu ikus hosi jogu entre nasaun boot rua ne’e, Portugál mak manán duni no Uruguay tenke derrota ho skore 2-0.

Komandante Tránzitu Munisipiu Díli, Inspetór Polísia, Domingos Sarmento Gama hateten, iha Segunda (28/11/202) lorokraik Otl, molok jogu hahú, adeptu sira iha kapitál Díli mobiliza malu hodi halo konvoi ho sira motorizada no membru Polisia konsege halo aprensaun bá evidénsia balun.  

PNTL tenke halo apreensaun bá evidénsia hirak ne’e, tanba maioria adeptu sira halo konvoi ho motór sira ne’ebé nia kondisaun inventadu ho kanu-resin, kesi ho bandeira Portugál nian hodi gás, balun la uza kapasete no la uza Xapa matrikula.

“Parte Tránzitu preokupa tebes ho ida-ne’e. Tanba ida-ne’e mak ita iha planu halo operasaun iha dia 28 novembru hahú tuku 20:00 to’o tuku 22:00 ita halo operasaun no konsege prende motorizada 19, kareta ida,” Komandante Tránzitu Munisipiu Díli, Inspetór Polísia, Domingos Sarmento Gama, hateten bá jornalista sira iha kna’ar fatin Caicoli, Kuarta (30/11/2022).

Maski nune’e, iha 28 novembru kalan ne’e PNTL la deteta joven ruma mak kondús motór ho kanu-resin tanba komunidade balun hatene katak, kalan ne’e tempu  ida ne’ebé mak Polisia halo patrullamentu rutina, nune’e sira labele lori sai.

“Mai fali iha 29 novembru oras madrugada, depois de jogu kopa mundiál, ita halo kedan operasaun ida, halo mós pasa-revista, ita prende motorizada kanu-resin 9, la uza kapasete 6, la uza espellu 1, no la lori dokumentus 1 ne’e hamutuk 17,” Domingos Samento Gama esplika.

Kanu-resin Tenke Multa $120

Komandante Domingos Sarmento Gama informa, bá motorista ka adeptu sira ne’ebé mak kondús motór ho kondisaun kanu-resin, bainhira tama operasaun laran mak PNTL prende, tenke selu multa $120.

“Koimas bá kanu-resin ne’e selu $120. Ida-ne’e másimu bá hotu-hotu la importa sé sé. Ne’ebé koimas atuál bá infrasoins iha kapitál Dili ne’e kuaze hanesan. Atu loron baibain mós, koimas ne’e másimu nafatin,” Domingos Sarmento Gama informa.

Komandante ne’e husu bá komunidade sira mak hela iha kapitál Dili katak, bá transporte motorizada sira ne’ebé mak utiliza kanu-resin, proividu, lei bandu, lei la fó dalan.

Sidadaun sé de’it iha direitu tomak atu fó ninia apoiu bá nasaun ida iha Jogu Kopa Mundial ida-ne’e, maibé joven sira labele koko atu viola fali lei.

“Tanba ida ne’e maka ami apela, karik iha tempu tuir mai adeptu sira labele repete tán. Bele la’o, maibé labele halo konvoi ho movimentu ida boot atu halo engarrafamentu, la fó dalan ba ema seluk atu ultrapasa,” Domingos Sarmento Gama apela.

Jornalista: Rogério Pereira Cárceres